“Aangoo fi humna guddaadhaan
Kiristoos du’aa ka’eera
Seexana hidhuudhaan
Addaam bilisoomsuun
Kanaan booda
Gammachuuni fi nageenyi taheera”
“Yaa
kaadhimaa koo Libaanonii ka’ii na bira koottu, Libaanonii ka’ii na bira
gahi, roggee Tulluu Amaanaa irraa, roggee Tulluu Siinaarii fi Heermon
irraa, iddoo boollii leencotaa jiru,Tulloota qeerransaa irraas gadi
bu’i. Weedduu Weedduu Caalu 4:8
I. Duubee
Seenaa
Teektaa
fi
Batriqaa kan jedhaman haadha warraa fi abbaa warraattu ture. Abaabilee
fi
akaakilee Dubaroo Maariyaamiiti, warra baay’ee sooramaa kuni hafe hin
jedhamnee
dha. Qabeenya guddaa haa qabaatan malee
dhala dhabuudhaan yeroo dheeraadhaaf gaddaa fi Waaqayyotti booyaa
turan. Baay’ina qabeenya isaanii irraa kan
kahe sa’aa fi qotiyyoo isaanii gaanfa irratti
warqii hidhaniif ture. Akkasumaan gaddanii osoo jiran guyyaa tokko abjuu
nama ajaa’ibsiisu tokko argan. Abjuun isaanis jabbii adiin yoo mooraa
isaanitii
baatu, jabbiin sunis jabbii wal fakkaatu dhalaa deemuudhaan jahaffaa
irratti
garuu yoo addeessa dhaltuu fi adeessi kuni ammo torbaffaa irratti yoo
biiftuu deessu argan . Iccitii abjuu
kanaas baruudhaaf deemanii yoo nama abjuu hiikuu beeku deemuudhaan abjuu
isaanii itti himatan.Namni abjuu hiiku sunis daa’ima ni deessu,dhaloota
jahaffaa irratti kan adeessa agartan garuu
kan hanga ammaa olitti dhalatan irraa, daa’ima namaa hunda kan caaltu
ni deessu, iccitiin biiftuu sana garuu anaaf hin ibsine, tarii raaja
yookaan mootii tahinaa laata jedheen. Isaanis kan biiftuu sana yeroon
haa hiiku
jedhanii gara mana isaanitti galan. Kana booda dhala ni argatan, maqaa
daa’ima dhalattes
He’emaan jedhaniin, hiikni isaas wareega koo argadheera, naaf
dhaqqabeera
jechuudha. He’eman Derden, Derden immoo Toonaa, Toonan Siikaariin,
Siikaar
Heermeellaa, Heermeellaan ammo Hannaa deesse. Haannan ammo
Iyyaaqeemiitti heerumte. Garuu kan dhala dhabuun abaabilee fi akaakile
isaaniirra gahe sun
deebi’e Haannaa fi Iyyaaqeem irraas gahe. Isaanis Dhala dhaban.
Daa’ima
dhabuu isaaniitiinis gadda gudaatu itti dhagahamaa jiraachaa turan. Fakkeenyaaf
gaafa tokko gara mana qulqullummaa kennaa kennuuf yoo deeman, lubni mana
qulqullummaa sun ‘isin immoo Waaqayyo cubbuu keessaniin miti kan dhala isin
dhoowwate’ jedhee harkaa fudhachuu dide.
Kanaanis baay’ee gaddan.
Guyyaa
tokko muka jala taahanii yoo bullaallan ijoollee isaanii wajjin taphatan Haannan
agartee “yaa Waaq kan bullaallaa nama hin taane kanaaf dhala kennite naaf dhala
na dhoowwate ani uumamni koo dhagarrayyii laata” jettee gadditee boossee,kadhatte.
Achumaanis ‘maaloo yaa Waaq yoo ilmoo nuf kennite dhiira tahu qotee nuu haa
laatuu hin jennu, dubaras yoo taate, bishaan waraabdee qoraan guurtee akka nuuf
ergamtu hin barbaannu, mana kee keessatti kan guddattu siif kennina jedhanii
Waaqayyotti dubbatan. Kanaanis Haannan ergamaa Waaqayyoon misiraachoon itti
himamee ni ulfoofte.
Yeroo
Haannan ulfa turtettis ajaa’ibni gara garaa raawwatameera. Haannan adaadaa
Barseebaa jedhamtu qabdi turte, ija tokko qofa qabdi. ‘Yaa Hanna Waaqayyo si
yaadateera natti fakkaata harmi keetis gurrachaa’eera, hidhiin kees goggogeera
jettee garaa Haannaa yoo qaqabduttu ijji ishee ifeefii jira. Dabalataas mucaan
eessuma ishee tokkotu du’ee. Ni jaalatti waan taheef yoo siree reeffi isaa irra
jiru qabattee yoo boossu, gaaddidduun
ishees reeffa irra bu’u mucichi ol ka’ee
‘ Nagaan siif haa tahu, haadha lafaa fi samii uumee’ jedhee dhugaa baheera.
Kanarraa
kan kahe Yihudoonni itti hinaafutti ka’an, kuni kan gadaameessa keessa jirtu, akkana
kan godhe gaafa dhalatte kanaan dura sanyiin isaanii Solomoon, Daawit waggaa 40
40 nu bitan kan dhalachuuf jiru kun immoo akkam nu godhinna laata jedhanii itti
hinaafutti ka’an.
II. Dhalachuu
Maariyaamii
Yihudoonni
waan itti hinaafaniif Haannan gara gaara(Tulluu) Libaanositti jalaa baqatte,a chumaanis
Haannan gaara Libaanos irratti Dubaroo Maariyaamii deesse. Dhaloota ishee kanas
Ogumma qabeessi Solomon ilmi Daawit akkas jedhee faarfateera
“Yaa kaadhimaa koo Libaanonii ka’ii
na bira koottu, Libaanonii ka’ii na bira gahi, roggee Tulluu Amaanaa irraa, roggee
Tulluu Siinaarii fi Heermon irraa, iddoo boollii leencotaa jiru,Tulloota
qeerransaa irraas gadi bu’i. Weedduu Weedduu Caalu 4:8
Yemmuu
Haannan gaara Libaanositti deessus namoonni Haannaa beekan gara Tulluu Libaanositti
gaafachuuf waan qaban hidhatanii(qabatanii) deessuu bosona keessaa kana
gaafachuuf deemanii jiru. Kanaaf hanga hardhaatti kunoo sana yadachuudhaanf Caamsaa
tokkotti alatti bunni ni danfa, mulluun ni affeelama, Daaboonis ni caba ,sirni
gara garaa kana ilaallatus ni adeemsifama.
Egaa
dhalachuun ishee Addaammii fi sanyiin isaa fi fayyina fi abdii ture. Aabbaa
Hiriyaaqos galateeffannaa Maariyaamii kan barreesse akkas jedhe, ‘Yaa Maariyaam
Addaam yoo jeennata keessaa ari’ametti abdiin isaa sidha,’ jedhe, yoo
abboommii Waaqayyo diiganitti ,inni
ilmoo ilmoo keerraa dhaladhee sin fayyisa jedhee waadaa galeefi waan tureef, waadaa
kana Addaam eenyurraa dhalatee akka isa fi sanyii isaa fayyisu ni dharra’a ni
abdatas ture. Kana qofa ossoo hin taanee Aabbaa Hiriyaaqos fakkeenya hedduun
fakkeesse dubaroo Qulqulleettii Maariyaamii galateeffata. Kana keessayis doonii
Nooh, eebba Seem, jaalalli keessummaa simachuu Abirahaam, riqaa Yaaqob, Tsillaata
Muusee, Masanqoo Daawitii fi fakkeennota heddu iccitii isaanii waliin kennee
jira
Biqiltuu
Jaannata keessaatti alaaf keessan dalleenfamte, alaa fi keessan dhagaadhaan kan
cufamtee burqaan boolla bishaanii si dha jedheen. Kunis cufamtee kan
chaappeefamte jedhee Qulqulluu Efreem kan dubbateen wal tokko dha. Isheen haadha
wareegamtootaati, duuka bu’ootaafis kabaja kan taate, ergamootaafis obboleetti
dha, qulqulluummaa isaaniitiin fakkeefamti waan taheef.
III. Dubaroo Maariyaamiin namoota
irraa wantoota adda ishee kan taasise keessaa Muraasni:
1.Haadha Waaqayyooti:
dubartoonni biraa yoo dahan raaja, yookan guddate yoo jedhame mootii yookan
duuka bu’aa yookan hayyuu tahuu dandaha, isheen garuu Waaqa,fayyisaa,Jaalala
nuuf deesse, kanaaf haadha Iyyasuus, Haadha Waaqa, Haadha jaalalaa jedhamti, kana
dubartiin kamiinuu aangoo akkanaa hin qabdu. Isheen Waaqayyoon gadi, uumamatoota
hundaa oli.
2.
Ergamaadhaan kan galateeffamte dha.
Ergamaan Qulqulluu Gabri’eeliin ati dubartoota keessaa kan eebbifamteedha
jedhee, misiraachoo itti himeera, dubbii galata heddus itti Dubbatee dha. (Wangeela
Luqas 1:36)
3.Kennaa Fannoo Jalaati:
gooftaan yemmuu barsiisaa turetti namoota hanga gabayaa shan gahantu isa duuka
bu’aa harka isaatiis nyaataa ture, namoota hedduus dhukkuba isaanii irraa
fayyisee jira, Yemmuu Inni fannifamu garuu duuka alaalatti duuka bu’oota fi
dubartota hordofaa turaniin caalatti, kan fannoo jalatti hiiqee isaaf boo’aa
ture Haadha isaa fi Yohaannis qofa dha. Kanaanis gama Yohaannisiin kunooti
haati kee jedhamee nuuf kennamteetti(Yoh 19:27)
4.
Gooftaa booda kan osoo namni tokkollee du’aa ka’uu hin argin du’aa kaate ishee
dha. Kunis Iyyaruusalem ishee samii keessa jirti. Taabota Door kan Iyyeruusalem
samii irra jirtu jedhee kan galateeffate Aabbaa Hiriyaaqos kanafi dha.
5.
Haadhas dubras kan tahe ishee qofadha. Dubrummaan ishees kan bara abaraati.
Yoosefitti kaadhimamuun ishee akka ishee eeguf malee akka dhirsa tahuuf miti. Isheen
osoo gooftaa hin dahin dura dubra, erga deessee boodas durba, durba dubrummaan
Hafuura Qulqulluun deesse, hanga dhumaattis durba taate dha. Dhagnaanis
yaadanis dubra, kana yemmuu jennu namni tarii dubartiin fooniin yoo dubra taate, deebite yaadan kan dubra
tahu hin jiru, isheen garuu yaadanillee raawwattee dubra dha.Hisq 44:1
6.
Nyaata biyya kanaa hinn nyaanne,Hibsistii Faanu’eel fiduun nyaattee guddatte
malee mana qulqullummaa keessatti,hanga waggaa 15 geessuttis mana qulqullummaa
keessa jiraatte.
7.
Gooftaan ajaa’iba jalqabaa kan raawwate kadhannaa isheetinii: Mana dookimasitti
yemmuu wayniin dhumutti isheetu kadhateef, Gooftaaniskan ati jette kana yoo
siif hin goone maal naraa qabdaree(maal wal irraa qabnaree kan kana walii hin
goone jechuudha) jedhee bishaanicha gara Wayniitti jijjiireera. Kanaan walii
galan Isheenis isa dhagahaa jette.(Yoh
2:1)
IV.
Dubaroo
Maariyaamiin Araarsituu keenya
Araaarsumma ergamootaa
fi qulqulloota kam iyyuu dursun, kiristaanonni hundi kan abdatan haadha gooftaa
Iyyasuus, dubroo Maariyaami dha. Kunis kan ta’e mataan mana kiristaanaa
Iyyasuus kiristoos waan ta’eef; mataa mana kiristaanaa kanas kan buufata
taatee, gadaamessaa isheetti ji’a sagal baattee kan deessee waan taateefi. Egaa
kun immoo dhama’iinsa fayyisuu Iyyaasuus kiristoos wajjiin wal qabata. Kiristaanni
kana hin hubanne immoo kiristaana karaa fayyinaa dinqii ta’e kana qulleessee
hin hubannee dha. Adeemsa fayyuu ilma nama keessatti dubroo Maariyaamin iddoo
guddaa qabdi.
Duruma foon gooftan
uffate kan isheerra argame lubbuun inni qabaates kan isheerra argame malee
eessaayyu kan dhufe miti. Guyyaa gooftaan godaanu wajjiin godaantee, laga
ceetee, gammoojjii qaxxaamurtee, tulluu qaariitee wajjiin dheebotee, wajjin
beeloftee, wajjiin boossee, wajjin naatee waa hunda wajjin taatee haadha
guddifte akka ta’es ibsuun waan barbaachisu miti. Kunis immoo Kitaaba
Qulqulluun kakuu haaraa keessatti dursee ibseera (Wangeela Matewoos 2:13)
dhumarrattis bal’inaan ibsameera. (Muldhata Yohaannis 12:14). Gadadoon kuni
hundi fayyina ilma namaa keessaatti iddoo guddaa qabdi kan jedhu bu’uura
godhata.
Kanaaf kiristaanonni
haadha keenya jedhuun. Kanas immoo gaarummaa fi haadhumma ishee waan beekuuf
warra isatti amanan hundaaf haadha akka taatuuf fannoo jalatti karaa
Yohannisiin kan nuuf kenne Gooftaa keenya Iyyasuus Kirstoosidha.(Yoh 19:27). Isheen
araaraaf akka ilma ishee maddii dhaabattu,Daawit akkas jedhee faarfateera:
“Uffata warqeen miidhagdee haguugamtee mootittiin mirga kee ni
dhaabatti, mucaa koo dhaga’i ilaalis, gurra kees natti qabi .Gosa kees mana
abbaa kees irraanfadhu; mootiin miidhagina kee jaalateera, inni gooftaa keeti”(Farfannaa
44:9)
Egaa dubbiin kuni kan akkasuman dubbatamee hafu miti gooftaan
dubbii raajota fi ooriitii keessa jechi tokko hafuuraa osoo ardii fi samiin
darbanii wayya jedhan.
v. Guduunfaa
Waa’ee
dubaroo
Maariyaamii dubbatanii xumuruuf ni rakkisa. Dubbiiwwan raagaa hedduun
akka soorgootti fi sookoo waa’ee ishee
of keessaa qabu. Addaam irraa eegalee hanga dhaloota isa dhumaatti kan
ishee
hin abdanne hin jiru. Namni cubbuun isaa baay’ee dha, waa hedduunis ni
moo’ama,
isheen garuu cubbuu moo’attee,qulqulluus taatee ibidda gadaamessa
isheetti baatte, kanaaf gama isheetiin jabina arganna. Gooftaa
Iyyasuusis gama isheetiin nutti firoome. Amma dhalachuu isheetiin haa
gammadnu,
kan fayyina barbaadu hundi yaa gammadu, kiristoos hubachuuf karaa inni
ittiin
nama tahe hubachuun dirqama, yoo sana immoo dubbii Maariyaamii
hubachuun dirqama taha.
Galatni
Waaqayyoof kan ardii fi samii diriirseef, Galatni Maariyaamiif qulqullummaan
Gooftaa keenya Iyyasuus Kiristoos kan deessef, Galatni Fannoo Gooftaaf kan
dhiigni Waaqumma irratti kan dhangala’eef ,baraa hanga baraatti. Ameen. Ayyaana
gaarii
Kitaabota Wabii
Hiikkaa galata Maariyaamii fi
Qiddaasee Maariyaamii,maxxansa jahaffaa,bara 1983,mana maxxansa Tinsaa’ee
zegubaa’ee,Finfinnee
Kitaaba Qulqulluu Afaan Oromoo fi Afaan Amaariffaan Qophaahe.
