Yaa’ii Walii Galaa 2ffaa Waldaa Duuka Buutotaa

(Hagayya 24-25,bara 2005, Gadaamii Dabra Libaanos Salaale)

Maqaa Abbaa kan Ilmaa kan Afuura Qulqulluu Waaqa Tokkoon. Ameen!

Yaa’ii walii galaa kana irratti, yaa’iwwanii fi walgahiiwwan kana dura waldichaan adeemsifaan caalatti kan miseensonni baay’inaan irratti argamani fi hirmaatan, akkasumas kan qophiin gahaan itti godhame dha. Yaa’ichis Gadaamii Dabra Libaanositti adeemsifamuun isaa kaayyoo lama qabateeti. Inni jalqabaa, miseensonni waldichaa iddoo qulqullaa’oo irraa suga akka argatan gochuuf, akkasumas  kutaa biyya keenya gara garaa irraa gara gadaamichaatti ayyaana Hagayya 24 kabajamu kabajuuf hordoftoonni amantichaa waan dhufaniif  miseensota heddu yaa’icha irratti hirmaachisuuf  ture. Yaa’ichi sirna kabaja ayyaana Taabota baasuu fi sirna Qiddaasee(galateeffannaa) Gadaamii Dabra-Libaanositti raawwatee booda, iddoo yaa’ichaaf qophaa’etti eegaleera. Yaa’ichis kadhannaadhaan eegalee, Gabaasa gabaaba bara 2004 akkasumas gaabaasawwan raawwii hojii bara 2005 dhageeffatee, ciminaa fi hanqina jiran irratti yaada kennee mari’ateerara. 

Akka gabaasa kana irraa hubatamettis, hojiin jalqaba ta’e of eeggannoo guddaadhaan miseensota horachuun maddiitti, kitaabotni hafuurawaa kan lallaba wangeelaa fi amantaa Ortodoksii Tawaahidoo hubachuuf gargaaran lakkoofsan 100 ol ta’an bituu fi walitti qabachuu ture. Akkasumas meeshaalee barreeffamaa muraasa waldaaf  barbaachisanii fi danbii ittiin bulmaataa fooyyessuu, waltajjii gara garaa irratti kaayyoo waldichaa ifatti teessisuu, abboota mana amantaa hoogganan mariisisuu fi yaada walitti qabachuu, baldhinaan itti raawwateera. Gama Kitaaba qoheessuutiinis barreeffamni kitaaba tokkoo xumuramee maxxansaaf qophee tahuun isaa ibsameera. Waldichi miseensota fi deeggartoota hirmaachisuudhaan kitaaba Galata Maariyaam Afaan Oromootiin barraa’an walitti qabuudhan gara karrayoota cuuphamaniis ergeera. Walitti dhufeenyi miseensota gidduutti jirus akka cimuuf yeroo yeroon marii fi imala qopheessuun waliin walhubachuu fi wal iyyaafachuu akka eegalan taheera.

Ajandaawwan Marii torba tahan irratti mari’ate keessayis inni lammataa, karoora bara 2006 irratti mari’achuun raggaasuu yoo tahu, bara kanatti beekkamtii qaama seerummaa walqabatee hojiin bara 2005 keessa abboota waliin mariin godhame, jalqaba bara kanaa irratti ni raawwatama jedhamee abdatama. Akka karooratti kan qabaman keessaa, biloog saayitii waldichaa gara weebsayitiitti guddisuu, kitaaba barreeffame maxxansiisuu fi raabsuu, ayyaana hundeeffama waldicha waggaa lammaffaa Onkololessa 14 kabajuu, biiroo dhaabbataa qabaachu fi kan biroos keessatti argamu. Dabalataan marii kana irratti sa’aatii heddu kan fudhate wa’ee Kitaaba ‘kiristaanummaa Ortodoksii fi Oromoo’ jedhu yoo tahu yaada baldhaan kallatti gara garaan irratti godhamee, mormiin fi gaaffi heddunis irratti ka’ee jira. Barbaachisumman kitaabicha kan wal nama gaafachiisuu tahuu baatus, kitaabicha qopheessuuf kaapitaala heddu kan barbaachisu, qo’annoo fi qorannoo, funaansa wabii jalqabaa(Primary source) fi wabii lammataa barreeffama kitaabota durii hiikuun fi kan kana fakkaataan of eeggannoo gadi fageenyan godhamuun akka barbaachisus irratti mari’atameera. Haaluma kanaan garee kitaabicha barreessuuf  haala mijeessuuf koreen nama shan qabu filatamee, piroposaalicha kitaaba dhiheenya keessa akka saffisisuufi abboota waliin quunnamuu fi barsiisota Yuunivaristii barsiisan seenaa irratti qo’anno gaggeessaniin hoogganamuun hojichi akka itti fufu gochuun yeroo yeroon koree hojii raawwachiiftuuf gabaasa akka dhiheessu qabu irratti walii galameera. Wabii walitti  funaanuun erga eegalamee waggaa lamaa ol tahuuf gahus, ammas ragaawwan dabalataa argachuuf  yoo xinnaate waggaa tokko ol ni barbaada. Kanaaf bara 2006 kanas qabiyyeen isaa sirriitti adda bahee fi gaaffiin qo’annichaa ifatti taa’anii kan hojiin baldhinaan itti fufu akka tahu murtaa’eera. Kitaabni kuni gaaffii namoota heddu keessumattuu yeroo ammaa ka’aa jiraniif  deebii hanga tokko ni deebisa abdiin jedhus gamanumaa eegamaa jira.Garuu gaaffii hunduma ni deebisa jechuufis ni ulfaata. Waluma galatti kitaabichi kana booda waggaa 2 ni fudhata jedhamee eeggama.

Ajandaan marii inni sadaffaan ammoo miseensonni hanga ammaatti buusii miseensumma kan hin buusne yoo tahu, buusiin miseensummaa gadi aana miseensonni buusanis murtaa’eera.  Haaluma kanaan barataa sadarkaa kam irra jiruufu ji’a ji’aan birrii 1 akka buusan kan murtaa’e yoo ta’u, hojjettoonni mootummaa fi dhunfaa garuu hanga argatan(harka isaanii gahu irraa)  parsantii (0.5%) qofa akka  buusan kunis bara 2006 irraa akka eegalu irratti walii galameera. Haa ta’u malee, buusiin murtaa’e kuni baay’ee gadi aanaa ta’usii fi namni gammachuudhan akka hirmaatu yaadamee kan taa’e tahus, hanga humna ofiitti sanaa ol namni miseensa tahes hin taanes waldicha gargaaruu fi tajaajila hafuurawaa Afaan Oromootiin kennamaa jiran kana birxa baasuun ni danda’ama jedhameera.

Dhimmi marii inni afraffaan ammoo Caasaa Waldichaa fi danbii ittiin bulmaata waldichaa irrattis, ogeessa seeraatiin hoogganamee,  marii dheeraan kan godhame yoo tahu, foyya’iinsi irratti godhameera. Kan kana dura jiru irrattis  koree hojii raawwachiiftuu irratti  kutaan tajaajilaa lama itti dabalameera. Isaanis kutaa qindeessaa dameewwanii fi kutaa deeggarsa ogummati. Kutaan qindeessaa dameewwanii miseensota fi damee iddoo gara garaa irraa gabaasa funaanu, rakkina isaan muudatuufis koree hojii raawwachiiftuu waliin mari’achuun furmaata kennuu fi akka dameetti banamuuf dameewwan ulaagaa guutan eessatti akka tahuu qaban  ni qo’ata. Tajaajila biyya alaatti raawwatamaniifis haala ni mijeessa,karaanis  akka saaqamu ni godha.

Kutaan deeggarsa ogummaa ammoo yeroo barbaachisa ta’etti dhimma seeraa fi hojiiwwan ogumma kan akka Injinaaringiin wal qabataniif deeggarsa ni godha jedhamee amanama. Gama caasaatin ammas barbaachisumman Boordii qajeelchaa kan itti amaname tahee, koree hojii raawwachiiftuutiin kaadhimamanii yaa’ii walii galaatiin ni filamu. Boordiin qajeelchaas hojiiwwan gurguddoo sadarkaa biyyatti ta’an irratti qajeelcha ni kenna, qaama mootummas ta’ee kan biroo wajjin ni mari’ata, deeggarsa hojii waldichaaf ni kenna. Itti gaafatamumman Waldaa Nahimiyaas Betekihnetii mana amantaa Ortodoksii Tawaahidoo Itiyoophiyaatif ta’a.

Gama ulaagaa miseensummatinis akkasuma fooyya’insi ta’eera. Ulaagaawwan kana dura jiran akkuma jirutti ta’anii, amma kan itti dabalaman, miseensa tahuuf, bara 2006 irraa eegalee waraqaa deeggarsaa mana kiristaana itti tajaajilaman irraa akka fidanii fi miseensota Waldicha keessa jiraniin deeggarsa argachuu akka qaban murtaa’eera. Dabalataanis gama kamiinuu ilaalcha siyaasaa waldicha keessatti calaqqisuun gonkuma dhoorkaa akka tahes mari’atameera.

Ajandaan marii inni biraa ammoo  walitti dhifeenya miseensota gidduu jiru dha. Kanaanis keessattu miseensonni naannoo tokkoo yookan magaala tokko keessa jiraatan  yeroo gaddaa fi gammachuu, caalatti ammoo yeroo rakkina fi gaddaa wal bira dhaabachun wal jajjabeessu, wal gargaaruu, waliif kadhachuu akka qaban sirritti ibsameera. Kunis tokkumma waldichaaf  kan gargaaru yoo tahu, hojii hawaasa keessatti hojjetaman hunda saffisiisuuf  hawaasa hirmaachisuuf  ni gargaara. Miseensonni  waldichaa hundumtus safuu hawaasaa kan eegan akka tahaniifi seera biyyattiin ittiin bultu kamiinuu kabajuun akka tajaajilan caalatti cimaniis akka hojjetan  irratti walii galameera.

Yaa’iin walii gala Waldaa Duuka Buutotaa yeroo hunda waggaatti al tokko baatii Adoolessaa/Hagayyaa/ keessa ni adeemsifama.

Nagaan jalqabsiisee nagaan kan nu xumursiise Waaqayyoof galanni haa ta’u!