Torban Jalqabaa Sooma Guddichaa

Maqaa Abbaa kan Ilmaa kan Hafuura Qulqulluu Waaqa Tokko! Ameen.

“Sooma Qulqullaa’aa labsaa,” (Iyyu’el 2:12)

Mana amantaa Ortodoksii Tawaaahidoo keessaa soomni labsii torbatu jira. Sooma labsii yoo jennu hordofaa amantaa sanii kan tahe hundi kan itti hirmaatu jechuu dha. (Waa’ee sooma dabalataan baldhinaan dubbisuuf maaloo saayitii kanaa gadi kana banaa ilaalaa (http://www.maaddiijaalalaa.blogspot.com/2012/08/wn006sooma-fi-kadhaa-akka-mana.html). Soomawwan labsii jiran kana keessaa hangafaa fi guyyoota baldhaa soomamuudhaan kan beekkamu sooma guddicha kana. Soomni kun Sooma Mootis jedhamee beekama. Kan kana jedhameefis gooftaan gooftotaa, mootiin moototaa, Iyyasuus Kiristoos waan ofii Isatiif  somefidha. Gooftaa Iyyasuus Kiristoos akkuma wangeela irratii barraa’etti  erga cuuphamee booda gara lafa onaa(gadaamii) Qorontos deemuudhaan guyyaa 40 fi halkan 40 sooma kana soome.

“Ergasii Iyyasuus seexanaan qoramuudhaaf hafuura qulqulluudhaan gara lafa onaatti geeffame. Inni guyyaa afurtamaa fi halkan afurtamaaf erga soomee booddee beela’e. Yommus inni isa qoru dhufe,ati dhuguma ilma Waaqayyoo yoo taate, dhagoonni kun buddeena akka tahan abboomi ittiin jedhe.  Iyyasuus garuu deebisee, namni nyata duwaadhaan hin jiraatu, dubbii afaan Waaqayyoo keessaa bahu hundumaan malee’ jedhamee caaffameera jedhee deebise.” (Mat 4:4)

Gooftaan keenya yoo soomu, halkan afurtamaa fi guyyaa afurtamaaf ture, yoo soomuus guyyoota fi halkan 40 kanatti waan tokkollee hin nyaanne ture. Haa ta’u malee nuti yemmuu soomnu hanga dandeenyu sa’aatii soomuu dandeenyu soomna, yeroo baay’ees kan beekkamu ajajamu hanga sa’aatii sagaliiti.Baatii soomaa keessa sanbattan lamaaniin alatti, sirni galateeffannaa(Qiddaasees) kan godhamu sa’aatii booda.

Soomni gooftaa fi fayyisaa keenyaa kun kitaaba qulqulluu irratti guyyaa 40 soomama nuti maaliif guyyaa 55 soomna, kan jedhu gaaffiin jedhu ka’uu danda’a. Kanaaf Abbootni sababa lama teessisanii jiru. Sababni inni jalqabaa, Sanbata xinnaa fi Sanbata guddaa mana amantaa keenya keessatti bu’aa foonii fi aannanii irraa malee gosa midhaan irraa  hin soomamu. Kunis kabaja sanbattan lamaanii kana ibsuufi. Sanbanni guyyaa haara galfii fi boqonnaa waan taatefi. Sanbatni inni xinnaan kan gooftaan hojii isaa hunda irraa itti booqate dha. Sanbatni inni guddaan(Dilbatni) sanbata Kiristiyaanaa jedhame kan beekkamu ammo gooftaa fi fayyisaa keenya Iyyasuus Kiristoos du’aa kan itti ka’e dha. kanaaf Sanbattan lamaan guyyaa 40 keessa jiran waluma galatti 15 waan tahaniif, guyyootni soomaa 40 akka guutaniif abbotni guyyaa 15 itti dabalaniiru. Kiristiyaanota durii biratti lakkoofsi akkanaa kun kan baratame dha. Sanbattan lamaan  soomaaf hin lakka’aman. Sooma hirdhisuu dha malee baay'isyyn maal rakkoo qaba ree, kuni mormis kaasuu hin qabu. Sababni inni lammataa ammo torban jalqabaa kan Hirqaal(Zewerede jedhamu) kuni fi Torban sadeettaffan, gadadoo(himamaat) itti dabalamaniiti. Hirqaal kan jedhamefis seenaan akkas jedhu jira:

Hirqaal(Hiraaqliyoos) mootii Biizaantayin durii ture. Jabana isaa kanattis Faarsonni Iyyaruusalem Weeraruun fannoo gooftaa fudhatanii booji’anii turan. Innis gara Faarsitti duulee fannoo gooftaa isanirra fudhatee deebi’eera. Kanaaf Kiristiyaanonni gammachuudhaan seera qannoonaa keessatti maqaa isaatiin sooma kana moggasaniif kan jedhus jira.Tokko tokko immoo inni kiristiyaana waan ta’eef dhiiga lola irratti dhangalaaseef akka Waaqayyo dhiifama godhuuf  soomaan isa gargaaranis jedhu. Giriikonni garuu sooma Hirqaal kana hin beekan, garuu torban kanatti baaduu fi buuphaa malee foon hin nyaatan, ‘torban baaduu’ jedhuun isaan. Sababni isaanii garuu dhagni foon bare tokkumatti yoo nyaata  soomaa nyaatu ni dhibama,ni dadhaba kanaaf akka ceesisaatii itti fayyadamu jedhu(Abune Gorgoriyoos).

Egaa kana ilaalle amma gara torban saddeettan sooma guddichaa kana keessa jiranii haa ilaallu. Torban saddeettan  sooma guddicha keessa jiranii kun moggaasa mataa isaanii kan qabaniifi hundi isaanii sanbata guddaadha hanga sanbata xinnatti kan lakkama’aniidha. Jaarraa 6ffaa keessa kan ture hayyuun amantaa Qulqulluu Yaareed torban saddeettan sooma guddichaa keessa jiran kanaaf kitaaba ‘Tsooma diguwaa’  jedhamurratti faarfannaa mataa isanii qopheessefii ture, kanaaf torban saddeettan kunniin faarfannaa isaa kanaan maqaan mogga’eefi. Kunis seenaa gooftaan wangeela kessatti hojjetee fi barsiisa wangeelaa wajjin wal qabata. kanuma irraa ka’uudhaan maqaan isaanii walduraa duubaan torban jalqabaa ‘Zewerede’ yookan Hirqaal, torban lammataa qulqulleettii, torban sadaffaa, Mukiraab, torban afraffaa Matsaaguu, torban shanaffaa tulluu ejersaa, torban jahaffan gebreheer, torban torbaffan Niqoodimos, torban saddeettaffan ammo Hosaa’inaa jedhamu.

Torban Jalqabaa/Zewerede/Hirqaal/

Torban sooma guddichaa inni jalqabaa kun maqa lama qaba. Zewerede yookaan Hirqaal jedhama. Zewrede kan jedhu kun afaan Gi’iziiti,hiikaa gadi bu’uu,kan gadi bu’e jedhu qaba. Kan Zewerede jedhaamefis, gooftaa fi fayyisaan keenya Iyyasuus Kiristoos akkuma dura Waaqayyo ilma namaaf waada galeef Dubaroo Maariyaamii irraa  fooniin  dhalatee akka nama fayyisu dubbate sana ibsuufi. Samirraa gad bu’eee foon namaa uffatee dubaroo irraa dhalachuu isaa kan itti yaadannu dha. Namni hojii  fi aangoo ilma Waaqayyoo kan samiirraa gad buusisu qabaachuu baatuus gooftaan akkasumaan ilma namaa akka jaalate wangeela irratti akka kanaa gadiitti barraa’ee jira.

“Waaqayyo akkasitti tokkicha ilma isaa hamma  kennuufitti  biyya lafaa jaallate, kuni immoo isatti kan amanu hundinuu jireenya bara baraa haa qabaatuf malee haa baduuf miti…biyyi lafaa isaan haa fayyuuf ilma isaa biyya lafaatti erge malee”(Yoha 3:16)

Nama kabaja isaa ganamaatti deebisuudhaaf ilmi abbaa biraa osoo adda hin bahin lafa kannarrati dhufe, dubaroo irrayis tawaahidoodhaan fooniin dhalatee, amala lamarraa amala tokko tahe malee amala lama hin qabaanne, amalli Waaqayyummaa fi amalli foonummaa tokko tahan. Kananis foon uffatee  gidduu keenya dedeebi’e. Wangeela guyyaa kana mana amantaa keenya keesstti dubbifamuttis ‘Ilma namaa isa samii irraa gadi bu’e sana malee homtinuu gara samiitti ol hin baane’  jedha(Yoh 3:13)

Gooftaan keenya maaliif guyyaa 40 soome kan jedhuuf fakkeenyummaa kakuu moofaa fudhateeti. Raajonni baay’een kakuu moofaa keessatti guyyaa 40 soomuudhaan hojii gara garaa hojjetaniiru. Fakkeenyaaf  Muuseen halkan 40 fi guyyaa 40  soomee seera lapheen qofa beekamu  irraa gara seera ooritiitti kan deebise yoo  tahu, Goofaan immoo seera Ooritii irraa guyyaa fi halkan  40 soome seera wangeelaa nuuf kenne.Fakkeenyi biros ni jiru. Sooma kana keessa gammachuu garmalee fi alalummaa irraa fagaachudhaan gadda fi soomaan kadhannaa baldhaadhaan akka Waaqayyo kadhatan,yeroo kaan irraa haala adda taheen  dhagna ofii gaabbiin qulqulleessanii kan fooni fi dhiiga gooftaa  keenyaa itti fudhatanii dha.

Kitaaba ‘Tsooma Diguwaa’ Qulqulluu Yaareed barreesse irrattiis torban kanaaf faarfannan akkas jedhutu faarfatama:

“Waaqayyoon sodaachudhaan abboomamaafi, Waaqayyo garraamii, araarri isaas kan bara baraati, dhiifamni isaas dhalootaa hanga dhalootatti, nus sabni isaa hoolota bobbaasa isaati, gara mana isaatti abbomamuudhaan gara addaba’aa ba’ii isaattis galataan ol seenaa, sooma yaa soomnu, hiriyoota keenya haa jalannu, nutis ofii keenyaa wal haa jaalannu, sanbatni namaaf hojjetamteetti hoo, sanbata haa kabajnu, waan dhugaas haa hojjennu, Yaa gooftaa araaraa fi murteefan siif ciigessa, faarfadhas, karaa qulqullus nan adda baafadha” (Qulqulluu Yaared kitaaba Tsooma Diguwaa irraa)

Faarfanna Daawiit irraa ammo:

Sanbata kanaaf faarfannaan Daawiti sirna galateeffannaa ganamaa irratti(Qiddaasee irrati)  gidduutti diyaqonootaan lallabamu akkas kan jedhu dha:

“Sodaadhaan Waaqayyoof abboomamaa, rom’uudhaaniifis gammadaa,  ogummaas jabeeffadhaa, Waaqayyo akka hin dheekkamneefi”(Farfannaa 2:11)

Wangeelli guyyaa kana dubbifamus wangeela Yohaannis boqonnaa 3:10-24 kan jiru dha. “Dhuguma dhuguman sitti hima nuyi isa beeknu ni dubbanna,isa argines dhugaa ni baana, otuma ta’uu iyyuu nuyi isa nu dhugaa baanu hin fudhattan ;waa’ee isa biyya lafaa isinitti himnaan erga hin amannee ,waa’ee isa biyya samii yoon isinitti hime ammo attamitti amantu ree?......kan jedhu dha.

Sooma gaarii nuuf haa tahu,Waa’ee Isaa akka dubbannuuf kan nuuf heeyyame Maqaan Waaqayyo haa ulfaatu!

Torban itti fufa…………………………………………………………..

Kitaabota wabii

1.     Gitsaawee,(1991) Mana Maxxansa Tasfaa Gebresillaasee. Finfinnee.

2.      Gorgooriyoos (Phaaphaasii) (1991). Seenaa Ortodoksii Tawaahidoo Itoophiyaa, Finfinnee

3.      Mana Maxxansa Tinsaa’ee ze gubaa’ee (1988). Merha-Tsidq Bahila Haimanot, Finfinne

4.     Waldaa Kitaaba Qulqulluu Itoophiyaa (2000) Kitaaba Qulqulluu (81), Afaan Amaaraatiin kan Qophaa’e.

5.      Waldaa kitaaba Qulqulluu Itoophiyaa (1997ALA) Macaafa Qulqulluu,kan Afaan Oromootti barreeffamee, qubee laatiiniitin barreeffame.