Maqaa Abbaa kan Ilmaa kan Afuura Qulqulluu Waaqa
Tokkoon. Ameen!
(Kitaaba Bu’uurawwan Amantaa Ortodoksii Tawaahido
jedhu, Kan Waldaa Nahimiyaa Afaan
Oromootiin qopheesse irraa kan
fudhatame)
Manni kiristaanaa keenya waa’ee haadha keenyaa kan
lallabduu fi kan barsiiftu daandii duuka bu’ootni irra adeeman bu’uura
godhachuudhaani. Giiftiin keenya, Dubroo
Maariyam sanyii namaa irraa kan argamte waan taatef rakkinni, namaa
dafee kan isheedhaf galu, dafee kan isheetti mul’atu, garaa laafettii dha.
Wangeela Yohaannis boqonnaa 2:1 irraa eegalee
dubbisni jirus kanuma dhugaa baha. Dookimas cidha qopheessee, affeeramtoonni
waamamanii, affeerranis dhihaatee osoo jiruu daadhiin waynii waan dhumeef
qopheesitoonni cidhichaa, waan namaaf dhiheessan dhabanii dhiphachaa turan.
Dhiphina namaa kan hubattu, gara laafettii waan taateef,haati keenya dubroo
Maariyaam rakkina isaanii osoo isaan itti hin himatin barte. Isheenis rakkina
isaanii kanaaf furmaata tokko akka kennuuf Ilma isheetiin “Daadhi waynii bar
hin qabani’ jechuudhaan kadhatteef. Ilmi ishees Gooftaan keenya Iyyasuus
Kiristos wanta isheen kadhattee rawwateefi jira. Gooftaanis bishaan gara daadhii wayniitti jijiiree
ajaa’iba isa jalqabaa kanaan eegaleera.
As irratti jechoota (dubbiiwwan) isaan gidduutti
godhame hubachuun barbaachisaa dha.
“Dubartii
nana sirraa maalan qaba” (Yoha 2:4)
Giiftiin keenya daadhi waynii hin qaban yemmuu
jettee kadhatetti Gooftaan keenya, deebii isheedhaaf deebisee keessaa dubbii
“dubartii nana sirraa maalan qaba’ jedhu dha. Hiikni dubbii kanaas isaas
‘Kadhannaa kee kana akkan siif hin raawwanne anaaf si gidduu lola fi falmii
maaltu jira ree?’ jechuudha. Fakkeenyaaf akkuma warri keenya yemmuu nu ajajan,
wal irraa firooma (aantee) qabaachuu isaanii osuma beekamu, ajajicha isaanis
raawachuuf akka hin didne (hin turre) kana yoo hin goone ta’e maal wal irraa
qabna ree jedhan, Gooftaan keenya Iyyasuus Kiristoosis haadha isaa Dubroo
Maariyaamiitiin akkan kana siif hin raawwanne maaltu na dhowwaree, lola maalan
sirraa qabaree jedhee deebiseeraaf.
Shakkitoonni garuu dubartii nana maalan sirraa qaba
kan jedhe kana akka waan Gooftaan haadha iIsaa salphisetti fudhachuudhaan
barumsa dogongoraa fi hubanno gadu fagoo osoo hin qabaatin barsiisu, kanaanis
araarsummaa ishee ni ganu.Haa ta’u malee Gooftaan Inni abboommii abba fi haadha
keessan kabajaa jedhee barsiisu haadha haala isaan hiikan kanaan haadha isaa
adabab’aba’ii irratti akka hin salphisne hubachuun barbaachisaa dha.
Keessumattu kitaabota gahuumsa malee hubannoo foonii dhiigaatiin yeroo dhihoo
keessa hiikkamaa fi barreeffamaa jiran irratti ilaalchi dogongora tahe kuni
akka baldhinaan tamsa’ee nama raatessu carraa guddaa uumee jira.
Akka fakkeenyaatti kitaaba qulqulluu Afaan Oromootiin bara 1997 maxxanfame irratti “Haadhoo maaliif hojii koo keessa lixxa” jedhamee kan barraa’e gonkuma sirrii kan hin taanee fi kan gareen ortodoksii hin taane olaantumma raabsa kitaaba qulqulluu keessatti qaban fayyadamuudhaan barreessan malee hiikni inni dhugaan kan ibsu garuu, haadha koo kan kana siif hin goone maalan sirraa qabaree hiikkaa jedhu laata. Kanas ammo wanta isheen kadhattee, bishaan gara daadhii wayniitti jijjiiruudhaan agarsiiseera. Haatii fi Ilmi irratti walii galaniiru, addunyaan garuu hanga ammaatti irratti yoo walmormu agarra.
Akka fakkeenyaatti kitaaba qulqulluu Afaan Oromootiin bara 1997 maxxanfame irratti “Haadhoo maaliif hojii koo keessa lixxa” jedhamee kan barraa’e gonkuma sirrii kan hin taanee fi kan gareen ortodoksii hin taane olaantumma raabsa kitaaba qulqulluu keessatti qaban fayyadamuudhaan barreessan malee hiikni inni dhugaan kan ibsu garuu, haadha koo kan kana siif hin goone maalan sirraa qabaree hiikkaa jedhu laata. Kanas ammo wanta isheen kadhattee, bishaan gara daadhii wayniitti jijjiiruudhaan agarsiiseera. Haatii fi Ilmi irratti walii galaniiru, addunyaan garuu hanga ammaatti irratti yoo walmormu agarra.
Dabalataan dubbii kana hubachuuf fakkeenya wal
fakkaataa kakuu moofaa keessaa haa ilaallu. Fakkeenyaaf Eliyaasiin tajaajilaa
kan turte, dubartiin Saaraptaa ilmi ishee yemmuu jalaa du’etti, ‘Eeliyaas nama Waaqayyoo maal
na irraa qabda, jettee gaafatteeti. Dubbiin kuni wal diddaa hin ibsu.
Inumaayyuu raajaa Eliyaasis gadda ishee hubatee Waaqayyoon kadhachuun ilma
ishee du’aa kaaseefi jira (1Mot 17:18).
“Yeroon
koo ammallee hin geenye.”(Yoh.2:4)
“Yeroon koo ammallee hin geenye” jechuun Isaa ammo
daadhiin waynii gonkuma waan raawwatee
gaanii keessaa hin dhumneef, hamma duguugamee dhumutti na eegaa jechuu
barbaadeti. Kan jiru baay’ise osoo tahee, isuma sana baay’ise jedhama,
ajaa’ibsama (dinqii) jedhamuu hin
dandahu ta’a jedhani akka hin sababeeffanneef gochuu waan barbaadef ture.
Hiikkan biraas Yihudaan gadi bahee waan tureef
ajaa’iba yoo hojjetu irraa addaan na fo’eef, akka duuka bu’aa isaatti ana hin
ilaalle akka hin jenneefi. Kanaafis dabarsee Yihuudootaf qarshii 30 tti
gurguruu isaatiif sababa akka hin teessifneefi (Hiikkaa wangeelaa). Garuu
iccitiin dubbii kanaa inni guddan yeroon ilma namaaf fannoo irra oolee foon koo
kutee, dhiiga koos itti dhangalaasu hin geenye jechuu isaati. Gooftaa Iyyasuus
“yeroon koo hin geenye” bakki itti jedhe kan biras jira ture.
Ayihidooni isa qabuuf yemmuu barbaadanitti, yeroon
isaa waan hin geenyeef harka isaanii itti buusanii Isa qabu hin dandeenye (Yoh
7:6,8:20). Yeroonsaa yemmuu gahetti garuu Gooftaan keenya, “sa’aatiinsaa
gaheera, yeroon koo dhihaate” jedhee dubatteera (Yoh 17:1, Mat 26:18).
Mana cidhaattis giiftiin keenya kan kadhatte
isheedhaaf raawwachuuf yeroonsaa yemmuu gahetti hojjettoota ajajee, gaaniwwan
bishaanii erga guuchisee booda, bishaanicha gara daadhii wayniitti (bookatti)
jijireera.
Shakkitoota dabalatee, namoonni muraasni hubannaa
gadi fagoo dhabuu irraa kan ka’e, ilma ishee malee Dubroo Maariyaamiin kitaaba
qulqulluu keessatti bakka akka hin qabnetti yaadu. Haata’u malee maaqaan
Giiftii keenya Dubroo Maariyaamii erga Gooftaa deessee jalqabee hanga fannoo
jalatti haadha hunda keenyaa taatee nuu kennamteetti (Yoh. 19:27) kitaaba
qulqulluu keessatti bakka hedduutti barreefamee jira. Akkuma abbootiin yeroo
mammaakan “Nama guyyaa rafetti guyyaan dukkana” jedhan ta’eeti malee iddoo
guddaa qabaachun ishee waan wal nama mormisiisu miti.
Hubannoo isa sirrii qabaachuuf, kitaaba qulqulluu
Qulqulluu laphee dhugaa barbaadun tasgabbiidhaan dubbisuu biratti hiikaa
iccitii dhokatee ammoo abboota gaafatanii baruun barbaachisaa dha.Waaqayyo
iccitii dhokate akka namaaf ibsu, kadhannaadhaan heeyyama Waaqayyoo
gaafachuunis barbaachisaa dha.
Giiftiin keenya dubroo Maariyaamiin:
·
Haadha
Gooftati (Luq. 1:43):
Dubroo Maariyaamiin kan deesse Iyyasuus kiristos Gooftaa tahuu isaa kan
fudhatte Eelsaabeex “haadha Gooftaa koo” jettee Afuura Qulqulluudhaan guutamtee
galateeffattee jirti.
Haadha
Waaqati (Luq. 1:36):
Ergamaan Waaqayyoo “Kan si irraa dhalatu qulqulluu Ilma Waaqayyoo
jedhama.” Jechuutiin dubbateera. Kanaaf kan Ergamaan akkas jedhe namni Dubroo
Maariyaam haadha Waaqaa jedhee waamu sodaatu, kan ishee irraa dhalate Iyyasuus
kiristos uumaa tahuu isaa nama amanuu hin dandeenye qofa dha. Maalif yoo jeenne
kan samii fi lafa kana uume ishee irraa argame waan taheef.
Haadha
Fayyisaati (Luq 2:11):
Iyyasuus kiristoos gara biyya lafaatti kan dhufe ilma namaa fayyisuufi.
Kanaafuu Innis Dubroo Maariyaamii irrraa foon uffatee erga muldhatee booda
addunyaa kanaaf cubbuu isaanii haquuf fannifamuun, addunyaa kana bilisa baasee
jira. “Hardha magaalaa Daawititti Fayyisaan isiniif dhalatee jira” (Luq. 2:11)
akkuma jedhu, kan fayyina argate addunyaan kuni Dubroo Maariyaam irraa kan
dhalateeni. Kanaafuu haadha fayyisaa jennee ishee waamna
Haadha Ifaati (Yoha 8:12): Ifti ilmaan nama Waaqa dha. Waaqayyoo ammoo
baleessaa Addaami fi Hewaaniin namaan adda bahe. Namni cubbuu raawachuu
isaatiin du’aan moo’amee dukkana
keessatti kufee ture (Rome 5:12). Sababa nama tokkootiin duuti gara biyya
lafaatti dhufe. Du’a Iyyasuus Kiristoosin addunyaan hundi jireenya argateera.
Kanaaf Inni ifa erga erga ta’ee isheen ammo haadha ifaati jechuu dha.
Waaqayyo laphee ittiin iccitii kana hubannu nuuf haa
kennu. Araarsummaan haadha keenya Qulqulleettii Dubroo Maariyaam nu waliin haa
ta’u.