Du'aa Ka'uumsa Gooftaa

“Aangoo fi humna guddaadhaan

Kiristoos du’aa ka’ee jira

Seexana hidhuudhaan

Addamiin bilisa baasuudhaan

Nagaan

Hanga bara baraatti

Nageenyii fi gammachuun ta’e.”

                                                   Dn.Guutaa Charuutiin

 “ Amma garuu warra mugaanif angaafa ta’ee Kiristoos du’aa irraa ka’eera. Hunduu Addamin akka du’aan , akkasumas kiristoos  dhaan immoo jiraatoo ta’aniru” 1ffaa Qoroonxos 15:20-21
Du’aa ka’umsa jechuun adda bahuun jiraacha kan turan fooni fi lubbuun lammata deebi’un tokkos ta’uun ka’uu fi du’a booda fooni fi lubbuun jireenya argachuu jechuudha. Du’aa ka’umsi bakka lamatti qoodama. Kunis dhali namaa yeroo foonin jiraatutti gaabbi galuun cubbuu fi xuraa’ummaa irraa qulqullaa’un gara Waaqayyootti kan deebi’u ka’umsa laphee jedhamuun kan beekamu fi dhuma irratti du’a booda jireenya baraa baraa jiraachuf kan ka’u (tinsa’ee zegubaa’e) jedhamuun kan beekamudha.
Ka’umsa jireenya bara baraa hiika isaa armaan olitti kan ilaalle yoo ta’u, innis bakka lamatti qoodama. Yeroo lubbuun dachee irratti jiraannu dhugaa hojennu irratti hundaa’un ka’umsa dhugaa ka’amu yoo ta’u, kunis ka’umsa kabajaa, ulfinaa, qulqullimmaa fi kan jireenyaaf ka’amu yoo ta’u inni lamaffaan immoo dachee/lafa irratti Waaqayyoon ganuun, balleessaa raawwachuun isa gaddaan ka’umsa salphinaaf ka’amudha. Ka’umsa kabajaa, ulfinaa, qulqullummaa fi jireenya ka’uuf lafa irratti hojii gaarii kan fayyinaa kan jireenya fi qulqullummaaf ta’u hojjetanii darbuun, gaabbii galuun iccitii qurbaanaa irratti hirmaachuun, adeemsa Kiristoos fi dhala namaa bal’inaan ilaaluf yaala.

Buu’ura barnoota du’aa ka’umsa namootaa kan ta’e du’aa ka’umsi Goofta keenya Iyyasuus Kirstoos kan ta’e eegalu uumamtoota irraa kaasee qooqa(afaan) raajotan kan dubatamaa ture dha. Raajichi Isaayaas “Duuni baraa baraaf ni jijjiirama” jedhee ture. Isaa 25:8. Jechi dubbii raajii kanaa ilaaluf bara Isaayyas irra dhaabachun gara fuulduratti ilaalu gaafata. Duuti akkamiin jijjiirame? Imimaan, boo’ichan, gaddi dhala namaa akkamiin haqame? Bara kakuu haaraa keessatti Waaqayyoo Ilmaa fooniin mul’ate booyicha fi imimmaan dhala namaa baroota(wagga)dheera irratti haqe.

Garboominis ni hafe. Duuni du’a isaan ni booji’ame yeroo sana ittiin beekama kan ture, ulee reebichaa si’oolin adabamuun ni hafe, ni jijjiirames. Qulqulluun Phaawuloos Raawwiin kun dhugaa ta’uu isaa yeroo ibsu “Yaa du’a waraanni(ilkeen)kee eessa jira? Yaa Si’ool moo’ichi kee eessa jira?” jechuun ibseera. 1Qor. 15:54-55

Kana irraas duuti moo’amu, jijjiiramu fi booji’amu isaa dhali namaa bilisummaa argachuu isaa hubanna. Kana malees dhala namaa booji’e moo’un kan isaan bita ture duuni ni jijjiirame, humna fi dandeettis ni dhabe, aangoon bittaa isaas ni dhabe jechuu raajichi Isaayyas “Du’oonni jiraattota ni ta’u, du’oonis ni ka’u” jechuun iccitii isaa ibseera. Isaa. 26:19 . kana malees Daawit “ Lubbuu koo Si’ool kessatti hin dhiiftu qulqulluun kees tortoruu akka arguf hin dhiistu” jechuun waa’ee iccitii du’aa ka’umsaa ibseera. Faar. 15(16):10
Qulqulluun Daawit qaaman dhugaadha du’eera. Kanaanis lubbuun isaa si’ool seenteti. Yeroo sana keessatti balballi Ganataa cufamuun ergamoonni qulqulluun seefii qabataniis ishee eega turan. S. Um. 3:24 . Sababa kanan qaamni isaa tortoruu saa argitetti. Du’a qofaas otoo hin ta’iin biyyees ta’uun lubbuun isaa humna du’aan dirqamntee jiraacha turte.
Kanaaf rakkina kana keessa kan isa boqochiisu ka’umsa guddaa hawwaa tureera. Lubbuun koo si’ool keessatti hin haftu jechuun dubachuun isaas kanaafidha. Qulqulluun yeroo jedha Waaqa dhugaa, tokko fi qulqulluu kan ta’e Gooftaan keenya Iyyasuus Kiristoos humna fi aangoo du’aa akka arguf hin dhiistu. Cubbuu, baleessaa fi yakka tokko malee fannoo irratti kan waraaname Kiristoos gonkuma awaalame hin hafu ni ka’a; ka’umsi isaa lubbuu Daawit si’ool keessa bahuuf wabbii (mallattoo) guddaa akka ta’u dubachuu isaa mul’isa. Hoj. Du. 2:31, Luq. 13:36.
Fakkenyi kan hin kennamne otoo tahee namni akkamiin hubata?

“Fakkenyan afaan koon nan bana erga addunyaan uumame irraa eegale kan dhokaten nan dubbadha” Far. 77(78):2, Mat. 13:34. Uumama Addaam irraa eegale kitaaba Qulqulluu irratti ibsaman dubachuu dhiiga Abeel, fudhatamuu Heenok, ol bahuu Eeliyaas fi k.k. fakkatan du’aa ka’umsa kan ibsaanidha. Seera Uum. 4:10, 5:24, 2Mot2:11. Kakuu moofas ta’e haaraa keessatti qulqulloonni du’oota kaasun isaanii du’aa ka’umsa kan mirkanneessudha. 1Mot. 17:24, 2Mot. 4:18, Yoh. 1:43-47, Hoj. 9:36-43. Kakuu haaraa keessatti Kiristoos fakkenyan ibsa kan ture ka’umsi isaa raga tokkodha. Yoh. 2:18, 19:22.

 Kana immoo mee murasaa isaanii haa ilaalu. Ibr.11:17-19. (Abrihaam mucaa isaa arsaa gochuuf adeemu isaa). Abrihaam umurii bara dulluma isaa keessatti kennaa Waaqayyoon kan argate Yisihaaq Waaqayyoof kan bitamu, kan ajajamu, nama gaarii, qulqulluu fi qajeela waan ta’eef, mucaa abdiin argate aarsaa gochuuf gara tulluu Mooriya adeeme. Adeemsa guyyaa sadiin boodas bakka aarsaa yeroo gahe fi aarsaaf yeroo qophaa’etti qulqullummaa laphee fi qajeelummaa isaa arguun ajajamumaa isaaf qabu hubachuun bakka Yisihaaq hoola kennef. Abrihaam ilma isaa aarsa gochuu haa dhiisu malee, samuu fi yaada isaan kan ilma isaa aarsaa godhe guyyaa sadiin duradha.

Addaam sababa balleessaa fi cubbuu isaan kabaja, ulfina fi qulqullummaa isaa dhabuun irrayyuu teessoo kabaja isaa irraa arii’ame dhabuun yeroo godaanetti bakka Addaam bu’uun foon dhala namaas uffatee hoolan Waaqayyoo of aarsaa godhe dhiyeesera. Aarsan Yisihaaq ni hafe lubbuun isaas ni baraarte. Addaamis aarsaa isaan kabaja fi ulfina kanaan dura dhabe ni argate gara teessoo isaattis ni deebi’e. Mat. 12:39-40 (Yoonaas garaa Qurxumii keessa guyyaa fi halkan sadii buluu isaa)

Dhali namaa amaluumaasaatiin isaan mallatoo cimsee barbaada. Waaqummaa Goofta keenya Iyyasuus Kiristoos fudhachuu irrattis fakkenya akka isaanif kennu isa rakkisaa turuun isanii illee kanuma mul’isa. Akana mallatoo barbaaduf garuu dura kan kennamef ture. Yeroo hundaa mallatoo haaraa kan barbaadu qofaa ta’e malee, “Isin mallatoo kan barbaadan akka beektanif kitaaba hundaa irratti mallatoon Yoonaas isiniif kenamee hin ture? Egaa mallatoo maaliif barbaadu?”

Yoonaas guyyaa fi halkan sadii garaa Qurxumuu keessa buluun isaa, guyyaa sadiin booda uumata Nanawee barsiisuf adeemu isaa, ni beektu. Uumani Nanawees dhufanii isinitti murteessu isinaan jedha hin amantaan ni shakkitu, isaanin jechaa barsiisa urtuun isaa waa’ee du’aa ka’umsaaf barnoota fi fakkeenya guddaadha. Yeroo du’aa ka’umsaa .Fakkenya hedduun kan fakkeefame fi raajonni hedduunis lallabaa kan turan du’aa ka’umsi Goofta keenya kana fakkataa ture.
Gammachuu guddaa-dhugaa guddaa Yoh. 19:35 “ Kan arge ragaa ba’eera, ragaan isaas dhugaadha”

Yerichi halkan bahee yeroo guyyaan bakka isaa itti fudhachuuf adeemu dhuma guyyaa sanbataa guyyaa sanbataa guyyaa hojii durati. Maariyaam Magdalaawit fi Maariyaam isheen lamaffaa barsiisaa isaanii du’aan kan isaan irraa adda bahe urgoorftuu dibuuf gara awwaala inni awaalametti halkan subiin(barii)gara awwaala Yoosef nama biyya lammii Armaatiyas ta’e, fi Gooftaan itti awwaalame kan isaan adeeman, barsiisaa isaanii foonin isaan irraa adda otoo hin bahiin jecha sagalee isaa dhaga’aa, raajii harka isaa jaalala isaaf qabaniin bitamuun jalaala isaanis jiraachaa turan .kanaafis halkan qixxee sodaa tokko malee gara awwaalicha isaa ilaala jaalala isaaf qabaniin bitamuun jaalala isaan jiraacha turan. Kanaafis halkan qixxee sodaa tokko malee gara awwaalcha isaaa deeman.

Jalqaba torbee yeroon isaas dukkana yeroo turetti ganama Maariyaam Magdalaawit fi Maariyaam isheen lammaffaa boolla awwaalchaa bakka inni itti awwalametti isa ilaaluf adeeman. Yeroo gara boolla awaalcha isatti seenan garuu ergamaan Waaqayyoo dhagaa awwalchaa boollaa irra turerra ta’uun isaanititi mul’ate. Ergamichis akkas isaanin jedhe

“Isin hin sodaatina Iyyasuus isa fannifame akka barbaaddan nan beeka” sa’aa kanatti yeroo namni tokko illee hin jirre fi soodachisaa ta’etti keessumaa immoo bakka awaalcha deemun dabalataaniis ergamaa arguun baay’ee sodachisa. Kanaafidha ergamaan hin soodatina kan ittin jedheef. Maalif sodaattu misiraacho an isinitti himuu kan isin aja’ibsiisu hin qabu, barsiisan keessa dursee isinitti himee ture, erga ittiin jedhee booda gammachuu guddaa itti hime; akka dubateen ka’eera, ittiin jechuun misiraacho fi gammachuu guddaa isaanitti hime.
Hangafoonni lubootaa garuu baratoonni isaa hataniiru; dubbii sobaa isaan ibsan fi akka dubbii Maariyaam Magdaalawit bakka biratti fudhataniiru kan jedhu utuu hin ta’iin dhugumaa inni du’a moo’ate du’aa ka’eera, kan jechudha. Misirachoon isaa ilmaa namaa harka namatti dabarfamee kenamee du’uuf guyyaa sadii boodas ka’uuf dirqamadha jecha jedhu. Galiila utuu jiruu awaan inni isinitti himee ture yaadadhaa!

 “Ilmi namaa harka warra cubbamootaatti kennamuuf, fannifamuuf, guyyaa sadaffaattis du’aa ka’uuf jira” jedhe” ittiin jedhan. Yommus isaan dubbii isaa yaadatan immoo, kana hundumaa ergamoota kudha tokko nuutti, warra kaan hundumaatti odeessan. Warra kana wajjin ergamootatti odeessan immoo, Maariyaam ishee Magadlaa, Yo’anaa, Maariyaam haadha Yaaqoobii fi dubartoota kan biraas turan. Garuu dubbiin kun kan hundee hin qabne, isaanitti fakkaate, kanaafis dubbii isaanii hin amanne. Haa ta’u iyyuu malee,Pheexroos ka’ee, gad jedhees awwaalicha keessatti kafana isaa duwwaa arge; kana booddee immoo wanta ta’e kana dinqifachas gara manaatti deebi’e. Luq. 24:1-12.

Gooftaan yeroo meeqaaf namoonni, duuka bu’onni isaan bira jirachuusaa isa hin beekin qaaman itti mul’ate? Sadiidha. Isaaniis.
I. Namoota lameen osoo gara Emaahusitti imalan. Luq. 24:13-32
II. Yeroo gara Iyyerusaalemitti deebii’an. Luq. 24:33-35
III. Osoo duuka bu’oonni mana cufaa keessa ta’anii, osoo balballi hin banamiin gidduu isaanitti argameera. Yoh. 20:19-23

Galatni Waaqayyoof haa tahu!Ameen.

Tibba Dhukkubbii

        Fayyinni keenya Iyyasuus Du’uu Isaatiini! (Luq.12:49)    

          Dn.Dr. Tolawaaq Habtaamuutiin                               

                                     

“Inni waa’ee irra daddarbaa keenyaaf madaa’e,waa’ee balleessaa keenyaaf rukkutame/reebame dheekkamsi fayyina keenyaas isarra ture;madaa isaatiin nuti fayyine.” Isa.53:5

Tibba dhukkubbii Gooftaa jechuun maal jechuudha?

v Guyyoota sooma guddaa keessaa torban isa dhumaa ykn guyyaa hosaa’inaatii kaasee hanga jala bultii du’aa ka’uumsa Gooftaatti guyyootni jiran Tibba Dhukkubbii Gooftaa  jedhamanii waamamu.

v Torbee kana keessatti Gooftaan keenya nama ta’uu isaatiin gidiraa fi rakkoo inni argetu yaadatama.

v Jechuunis Gooftaan keenya Iyyasuus Kiristoos dhala namaa gidiraa fi garbummaa seexanaa jalaa baasuuf fedhaa fi hayyema isaatiin jaalatee gidiraawwan kana kan simate malee uumamni ykn dhalli namaa dirqamaan abboomee kan irratti raawwatan miti.

    Guyyoota Tibba Dhukkubbii Gooftaa 

Wiixata:  Guyyaa gooftaan keenya Bitaaniyaadhaa gara Iyyerusaaleemitti deemuu muka balasii/harbuu/ firii hin qabne takka argee itti abaaree fi mana qulqullumaa keessatti namoota daldalanitti ol-seenee mi’a isaan daldalaa jiran waliin gadi-isaan yaaseedha. Kanaafuu,guyyaan kun guyyaa abaaramuu balasii fi qulqullaa’uu mana qulqullummaa jedhamee yaadatama. Mat.21:12, Mar.11:17,

Kiibxata:  barsisotni fariisotaa aangoo inni ittiin raajiiwwan (dinqii) kana ittiin hojjatu guyyaa itti gaafatan waan ta’eef  guyyaa gaaffii jadhama. Mar.11:7,Mat.21:13,Luq.21:23. Akkasumas Gooftaan keenya mana qulqullummaa keessatti waan barumsa dheeraa barsiisaa tureef guyyaa barumsaa jedhama. Mat.25:46,Mar.12:12.

Roobii: hangafoonni luboota Yihuudotaa fi barreesitoonni Fariisootaa guyyaa Gooftaa qabuuf itti mari’atan waan ta’eef guyyaa murtii/marii yihuudotaa jedhamee beekama. Mat.26:1,Mar.14:9,Yoh.12:8.

Kamisa: Kadhannaa Gooftaan keenya bakka biqiltoota lalisoo keessatti kadhate yaadachuun kadhannaa kamisaa/ kamisa magariisa jedhameera. Mat.26:36

Gooftaan keenya kasoominaan miila duuka-bu’ootaa gadi-jedhee dhiquun “isinis akkanumatti kanneen biroof raawwadhaa” jedhee waan ajajeef dhiqannaa kamisaa/ kamisa ajajaa jedhamti.

Gooftaan keenya icciitii qurbaanaa guyyaa itti hundeesse  waan ta’eef  guyyaa icciiitii jedhama. Mat.26:26,Yoh.13:1-dhu,Luq.22:20 .

Guyyaa kana Gooftaan waa’ee qurbaana isaa kan kakuu haaraa matuma isaa akka dhiheessu waan dubbateef  kamisa kakuu haaraa jedhamti.

Guyyaa kana waa’ee bilisummaa dhala namaa waan dubbateef  kamisa bilisummaa jedhamti.

Jimaata: Gooftaan keenya Iyyasuus Kiristoos Addaamii fi Ijoollee isaaf beenyaa(furaa) ta’ee Fannoo irratti waan fannifameef guyyaa Fannoo jedhama. Meeshaa adabbii yakkamtootaa kan ture Fannoo guyya itti Gooftaan dhiiga isaatiin qulqulleessee mallattoo jireenyaa, mallattoo araaraa fi ittiin seexana injifannu taasisee nuuf kennedha. Gooftaan aarsaa kakuu haaraa ta’ee of dhiyeessuun dhala namaa garbummaa seexanaa jalaa guyyaa itti bilisa baase waan ta’eef guyyaa bilisummaa jedhama. Yoh.15:15, Gal.5:1. Gooftaan guyyaa itti lubbuuwwaniif fayyinaa fi boqonnaa kenne waan ta’eef guyyaa qulqulluu jedhama. Mat. 27:48-53

Sanbata xinnaa: sanbattan biro irraa kan adda ishee taasisu waa’ee gidirfamuu Gooftaa keenyaaf jecha guyyaa itti soomnu waan ta’ee fi duuti Addaam diigamuun gara jireenya itti jijjiirame jedhamee waan himamuuf sanbata diigame/jijjiirame (ቅዳሜ ስዑር) jennaan.

                                  Sirnoota tibba dhukkubbii Gooftaa

Sirna/heerota: “yaa obboloota koo obboleessa akka duudhaa nurraa fudhatee osoo hin taane seeraan/sirnaan ala kan adeemu irraa akka adda baatan maqaa Gooftaa keenya Iyyasuus Kiristoosiin isin ajajna. Nuyiin fakkaachuun akkamitti akka isin irraa eegamu ni beektu; isin biratti nutis seeraan ala hin deemne waan ta’eef.” 2 Tes. 3:6-7.

Wantoota tibba dhukkubbii Gooftaa keessa raawwataman

1.     jilbeeffannaa፡  tibba kana keessa si’a 41 kiraalaayisoon (maaloo yaa Gooftaa nuuf dhiisi), si’a 12 “yaa abbaa keenyaa hoo……”  yeedaleeffamaa baay’isee ni jilbeeffatama. Akkasumas maqaawwan Gooftaa keenyaatiin/Iyyesuus Kiristoos, Amaanu’eel, Abnoodii, Masiyaas, Tisbuuxaa/ jechaa waamudhaan jilbeeffachaa ni yaadatama.

2.     Kadhannaa: tibba kana keessa sa’aatii 24 keessaa sa’aatiin dubbisaa fi kadhannaa 10tu jira. Isaan kunis guyyaa keessaa sa’aatii 1, 3, 6, 9 fi 11 yammuu ta’u halkan keessaa sa’aatii 1, 3, 6,9 fi 11 dha. Sa’aatiiwwan kanneen keesssatti gidiraawwan gooftaa yaadachuuf faarsaa Daawitii fi raawwiin dhukkubbii (ግብረ ሕማማት) baay’inaan kadhatama.

3.     Sooma:  tibba kana keessa nyaatawwan hedduu irraa of qusanna. Warra danda’amuufis galgala keessaa hanga sa’aatii tokko akka sooman, nyaata akka qorsoo, daabboo, bishaanii fi ashaboodhaan akka nyaatamu kitaaba raawwii dhukkubbii Gooftaa irratti barraaheera.

4.     Wal hin dhungatamu: Gooftaa keenya fannisuuf  Yihuudotni “yaa fannisnu, yaa ajjeesnu” waan jedhanii fi Yihuudaan Gooftaa dhungatee dabarsee waan laateef wal dhungachuun harka wal fuudhuu fi walitti maramanii nagaa wal gaafachuun dhorkaadha. Fannoos bara Kakuu Durii(Moofaa)  keessa mi’a adabbii yakkamtootaa fi mallattoo abaarsaa waan tureef Gooftaaan keenya kabajamaa dhiiga isaaatiin qulqulleessee mallattoo injifannoo hanga nuuf godhuutti tibba kana keessa hin dhungannu. (Gal.3:13, Mat. 10:38, 26:29)

5.     Hirmaachuu(አክፍሎት)፡ Dubroo Maariyaamii, Yaa’iqoobii fi Yohaannis du’aa ka’uu Gooftaa osoo hin argiin midhaanii fi bishaan afaaniin hin qabnu jedhanii hanga du’aa ka’uu Gooftaa turuu isaani yaadachuuf kan soomamudha.

6.     Shuummoo(ጉልባን): Baaqela, Qamadii fi Boqqolloo irra qophaa’uun guyyaa Kamisaa kan nyaatamu yoo ta’u kanis gadda tibbasanii ibsuuf yaadannoo raawwatamudha.

7.     Baala Ejersaan rurrukutamuu: kun tibba kana keessa Kiristaanonni cubbuu raawwatan lubootatti himachuun baala Ejersaatiin rurrukutamanii jilbeeffannaa kan ittiin fudhatanidha. Kunis fakkeenya rukutamuu/reebamuu Gooftaati. Baalli ejersaas fakkeenya nageenyaa, kennaa fi Yihuudaadhaan gaabbii gali jettee kan dubbattedha.

8.     Caffee/allaaddu: Gooftaan keenya du’aa ka’uu isaa akka nuuf ibse kan ittiin ibsinu yoo ta’u, fakkeenya gonfoo qoree Gooftaan kaawwatee jechuun mataa keenyatti hidhanna.

Walumaagalatti  torbee kana akka kakuu moofaatti ilaalama/yaadatama waan ta’eef siritti gadduudhaan waa’ee gidiraa gooftaa yaadachaa keessa keenyatti fayyina Gooftaadhaan argachuu keenya hubachaa kan ittiin xiinxalluudha.

JECHOOTA GOOFTAAN KEENYA FANNOORRATTI DUBBATE    TORBAN

1.     Waaqa koo Waaqa koo  maaliif na dhiiste?/Eelohee(2x) eelmas laamaa-sabaqatanii( Mat. 27:46)

Kana gooftaan ol kaasee dhageessisuun kan dubbate guyyaa keessaa sa’aatii sagalitti ture. Inni Waaqa ta’ee osoo jiruu maaliif Waaqa koo Waaqa koo jedhee dubbate yoo jedhan baroota hedduudhaaf(5500) seera Waaqayyoorraa fagaatee gatamuudhaan kan jiraate foon Addaam uffatee nama ta’uu isaa ibsuudhaafi. Akkasumas bakka Addaam bu’ee kadhannaa/booyicha Addaam dhiyeessuudhaafi. Raajiiwwan isaaf dubbataman akka raawwate ibsuuf . Inni biraa immoo seexana (Ergamaa duu’aa) gara isaatti dhiyeessudhaafi ture kana kan inni dubbateef.

2.     Yaa Abbaa waan godhan hin beekaniitii ati dhiisiif(Luq. 23:34)

Fannisuu isaanii malee eenyuun akka fannisan hin beekan waan tureefi. Akkasumas gidiraa yemmuu nurratti raawwatan, diinota keenyaaf kadhachuu akka qabnu nu barsiisuufi. Dhukkubsattoota malee warri fayyaan qoricha isaan hin barbaachisu akkuma jedhe, ani cubbamootan waamuu dhufe malee qulqulloota miti ( Mat. 9:12) isa  jedhe hojiidhaan ifatti mul’isuuf. Inni garaa-laafessa ta’uusaa ibsuudhaaf  jecha raajii( Isa.53:9) irratti kan dubbatame “akka saamtotaatti lakkaa’amee diraa’ota waliin gidirfame, garuu inni cubbuu namoota baay’ee baatee warra garaa jabaataniif kadhate”, kan jedhu raawwate jechuufi.

3.        Har’a ana waliin Gannata keessa ni teessa/taata (Luq. 23:35-43)

Iyyasuus Kiristoos isa fannifamee fi du’e, du’a moo’ee ka’e inni dhugumatti Waaqayyo jechuudhaan Waaqummaa isaatti amananii  warri laphee qulqulluudhaan kadhatan hundi motummaa  isaa duraan dhabne/ganne sana deebinee lammaffaa akka argannuu fi itti gallu/dhaallu yemmuu ibsuudha. “Dhugaa dubbatanii bakka namatti dhiite bulu” akkuma jedhamu dhugaatti(Yoh. 14:6) amannee ragaa baanee akka isa gara mirgaatti fannifamee(Xiixoos) sana gooftaa waliin mootummaa isaatti hirmaachuu nuuf wayya waan ta’eef  adaraa yaa saba Waaqayyoo dhugaadhaaf raga bahaa(Yoh.3:11,14:6). Waa’ee Iyyassus Kiristoos eessumattuu ragaa bahaa(Yoh. 3:11).

4.     Yaa Abbaa  Lubbuu/Ruuhii/ koo harka keettan imaanaa sitti kennadha.(Luq. 23:46)

Jecha kana kan dubbateef foon dubbachuu isaa ibsuu fi lubbuuwwan gita bittaa garbummaa Seexanaa jala turan bilisa bahuun gara bakka bilisummaa taate mootummaa Waaqayyoo galan jechuudhaa fi malee inni matuma isaatiin ‘Waaqa Waaqoliiti’.Gal.5:1. Kuni kan ibsu nutis gara Waaqayyootti yemmuu deemnu Lubbuu koo harka keettiin laadha jechuu akka qabnudha.

5.     Kunoo mucaa kee, kunoo haadha kee(Yoh. 19:26-27)

Jecha kana kan dubbateef haadha isaa fi jaalatamaa isaa kan ta’e Yohaannis ilma Zebdiyoosidhaafi. Hanga Qaraaniyootti warra  hordofanii dhaabbataniif Iyyasuus fannoorra osoo jiruu dubbateef. Kuni ammo isaan lamaan gidduutti qofa hafa osoo hin taane har’as isheen nu’iif haadha keenya. Nutis isheedhaaf ijoollee isheeti. “osoo  Waaqayyo sanyii nuuf hin hanbisne ta’ee akka Sodoomii taanee akka Gamooraa fakkaanna ture.” (Isa.1:9.) kan jedhames haadha keenya durboo Maariyaamiidhaani. Kun ammo kan ta’e Hafuurri Qulqulluu ishee golgee eeguudhaani. Kanaaf karaa Yohaannisiin nuuf kennamteetti waan ta’eef akkuma inni gara mana isaatti fudhatee gale sana nutis haadha keenya Maariyaamii gara mana keenyaatti fudhaachuu qabna. Jechuun araarsummaa isheetti amanuu qabna.

6.     Nan dheebodhe (Yoh. 19:28)

Kitaaba irratti nyaata kootti dhangaggaa’aa makan kan jedhame(Far.21:15,68:21) akka raawwatuuf ‘dheebodhe’ jedhe. Akkasumas Waaqayyo foon dheebotu, beela’u uffachuu isaa ibsuudhaafi. Ilma namaatirraa cubbuu akka hadhooftuu dhangaggaa’u balleesse/ haqee gatee yoo jedhu dhandhamee tufuun cubbuu keenya nurraa haquu isaa ibsa. Kuni kan ibsu Waaqni bishaan uume bishaan dhabee dheebote jechuu osoo hin taane ilma namaa irraa jaalala, tolummaa, gaarumma dhabe/dheebodhe yoo jedhuudha. Kanaaf Waaaqayyo keenya laphee qulqulluudhaan jaalachuu qabna.

7.     Ni raawwate (Yoh. 19:30)

Wanti kitaaba irratti barraa’e hundi raawwate yoo jedhuudha. Kana jechuun raajni Raajota qaaqqabuu isaa fi ijoolleen Addaam Gannata keessaa ari’amanii Si’oolii keessa jiraachaa kan turan erganaa ga’e/dhumateera jechuu isaati. Araddaa isaanii Gannata akka dhaalan hojiin fayyinaa rawwatame hojjetame yoo jedhudha. Fayyina keenya kan ittiin rageesse/mirkaneesse du’a isaatiin waan ta’eef dhumate jedhe. Kun hundumti isaa kan ta’eef nu fayyisuuf jecha gooftaan al- tokko fannoorratti aarsaa ta’uun of dhiyeessee bara baraaf cubbuu irraa bilisa nu baasuuf raawwii/tolummaa inni raawwateeni. Nutoo Waaqa hangana nu jaalate kana hangam abboomamneefii jirraa? Hangam jaalachaa jirraa? Hangam galateeffachaa jirraa? Dhuguamatti laphee qulqulluudhaan waaqeffachaa jirraayii? Deebiin isaa nu’ii fi isa gidduutti haa ta’u. “Waanuma maraafuu Abbaan hin rafuu” akkuma jedhamu bakkuma jirrutti kennaa nuuf laatameen cimnee tokkummaadhaan taanee laphee qulqulluudhaan uumaa Keenya yaa Waaqessinu haa galateeffannu.

                                       Faasikaa/Irra Darbaa/pass over

Faasikaan/Irra darbaan keenya Gooftaa keenya Iyyasuus Kiristoosi(1Qor.5:7). Kan irra darbe kun kakuu moofaa keeessatti ergamaa du’a baatee deemu ture.(Ba’u.12:3-16). Yeroo ammaa kana irra darbaan/faasikaan dhugaa ta’ee fi al-tokko du’a jalaa nu baase ilma Maariyaamii kan ta’e Gooftaa keenya Iyyasuus Kiristoosi,innis nuuf qalameera waan ta’eef(1Qor.5:7,Yoh.19:28,Mat.26:26).Hoolaa qulqulluun dhugumatti cubbuu addunyaa haquun du’a jalaa nama baasu Iyyasuus Kiristoos qofa wanti biraa tasumaa nu fayyisuu hin danda’u(Yoh.1:29). Kanaaf bara kakuu moofaa keessatti hoolaa qaluun baroota hedduuf ayyaana kana kabajaa turan. Har’a garuu nuti kabajuu kan qabnu foon hoolaa isa dhugaa ta’e kan gooftaa keenya Iyyasuus Kiristoos nyaachuunii fi dhiiga isaa dhuguudhaan ta’uu qaba malee hoolaa ykn lukkuu ykn re’ee qaluun nyaachuun tasumaa nu hin fayyadu, nu hin fayyisu. Kanaaf isa nu fayyisu jireenya barabaraa nuuf kennutti yaa hoognu. Foon koo kan nyaate,dhiiga koos an dhuge jireenya barabaraa argata jedha waan ta’eef(Yoh.6:53). Kanaaf yaa obboloota koo hoolaa faasikaa (foonii fi dhiiga gooftaa) nyaachuuf of haa qopheesinu. Ayyana gaarii!!!

     Kennaan Abbaa jaalalli Ilmaa tokkummaan Afuura qulqulluu hunda keenya waliin haa ta’u! ameen!

Waaqayyo dhibee fi dhukkubbii tokko malee, dheebuu fi dadhabbii tokko malee akkuma har’aan nu gahe guyyaa du’aa ka’umsa isaatiif nagahaan nuun haa ga’u.  Ameen!!!

                                                 Waaqayyoof galanni haa ta’u!!!

Madda: Kitaaba qulqulluu

Ragaa tolummaa/ስማዐ ጽድቅ/ bara 2002

Kitaaba dhukkubbii Gooftaa/ግብረ ሕማማት

Hosaa'inaa

Maqaa Abbaa kan Ilmaa kan Hafuura Qulqulluu Waaqa Tokkoon. Ameen.

                                           Mabree Maammeetiin

“Baatii ji’aatti, goobana ji’aatti, guyyaa ayyaana keenyaattis fiinoo afuufaa. Inni kun Israa’eliif seerrata, Waaqayyo isa kan Yaaqoob birattis, wanta qajeelaa ta’ee fudhatamee dha.” Faarfannaa 80(81):3

Torban darbe keessa waa’ee, ‘Niqoodimos’  ilaaluun keenya ni yaadatama. Akka moggaasa Qulqulluu Yaareditti ammo Sanbatni kun Hosaa’inaa jedhama. Hosaa’inaa jechuun fayyisaa, qoricha jechuu dha. Gooftaan gara Iyyaruusalemitti yoo galus faarfannaan  “Hoosaa’inaa Ilma Daawit maqaa Waaqayyoon kan dhufu kan eebbifamedha jedhu, Hoosaa’inaa Ilma Daawit iif,  Hoosaa’inaa Aariyaamitti jechuun faarfataa turan.Hayyuun amantaa Yaaredis faarfannaa kana gadii kana qopheessee faarfateera:

“Naannoo Ayyaana Faasikaatti duuka bu’oonni Waaqa dhugaa gara Tulluu Ejersaatti dhihaatan, tabba biyya Waaqayyootti Iyyaruusalemittis  manguddoonni fi ijoollen baay’een baala mexii qabatanii Hosaa’inaa Ariyaamitti jedhanii simatan. Buukarrii harree irra taa’es gammachuu guddaadhaan gara Iyyaruusalem seene.Warra kanaafis humnaa fi aangoo ni kennaaf.”

Egaa galateeffannaa ijoollee kana Faarsaa Daawit akkasitti duruma irraa raagee ture

“Warra si irratti ka’an deebisuudhaaf, diinaa fi isa ijaa baafatu gab gochuudhaafis, afaan mucoolii fi daa’imootaatiin irraa faarfannaa qopheeffateerta.” Far fannaa(8:2)

Gooftaan keenya duuka buutota isaa keessaa lama waamee gama fuula keessan dura jiru sana deemaa ilmoon harrees hidhamtee agartu hiikaatii natti fidaa yoo namni  isin gaafate Gooftaa keenyaaf ni barbaachifti jedhaanii jedhee ergeen, jarris akkuma inni jedhe godhan.

 “Borumtaas namoonni sonaan baay'atanii ayyaanichaaf ol ba'an, Iyyasuus Yerusaalem akka dhufu dhaga'an.  Damee muka meexxii harkatti qabatanii, isa simuudhaaf ba'an; sagalee guddaadhaanis, "Hosaa'inaa, mootiin Israa'el inni maqaa Waaqayyoo gooftaatiin dhufu galateeffamaa dha" jedhan.Iyyasuus yommus ilmoo harree tokko argatee irra taa'e; kunis macaafa keessatti caafameera; "Yaa ijoollee Xiyoon hin sodaatinaa, kunoo, mootiin keessan ilmoo harree irra taa'ee in dhufa" jedhame.  Bartoonni isaa si'a duraa kana hin hubanne; Iyyasuus ulfina isaatti erga ol fudhatamee booddee garuu, kun waa'ee isaatiif akka caafame, kanas akka isaaf godhan in yaadatan.(Wangeela Yohaannis 12:12)

Egaa ‘dubbiin dubbii keessa’ akkuma jedhamu ilmoon harree hiikamte dhufuun ishee kan hubachiisu dhukkubaa fi hojiiwwan seexanaatiin kan hidhamanii jiran akka fayyina argataniif maqaa Gooftaa keenya Iyyasuus Kiristoosiin akka fayyan hubachiisuuf  kan raawwatamee dha. Itti fufuudhaanis harreen kan tuffatamtedha, kun immoo kan nu hubachiisu yeroo gad-jedhanii Afuura Qulqulluu dhugaa irratti hundaa’anii gara Waaqaatti amanan kan hubachiisudha. Guyyaa kanatti amantoonni ykn uummatni uffata (huccuu) isaanii baasanii karaarra afuudhaan Waaqa keenya qulqulluu Uumaa hundaa siin miti harreen ati irra teesse illee buufatni kottee (dhokeen lafaa) tuquu hin qabu jechuudhaan kan godhanidha.“Hoosaa’inaa Ilma Daawit Hoosaa’inaa Aariyaamitti” jechuudhaan faarfachuu jalqaban. Dubbii baay’isuuf osoo hin ta’iin dhugaa dubbachuuf nus abbootii keenya jalqabaa duukaa bu’uudhaan amantaa qulqulleetti taate Ortodooksii jabaachuudhaan maatii keenya hiika adda ta’een karaa isaanii kan jijjiiran haala ga’aa ta’een dhugaadhaan hubachuun karaa isaanii akka sirreeffatan gochuun wal jabeessuu qabna. Gara mata duree kootti yommuun deebi’u walumaa galatti hiikni jechootaa:

Hosaa'inaa:- Hoosaa’inaa jechuun amma fayyisi, nu uumama keetiif fayyina kee bara baraa nuuf  laadhu jechuudha. Kunis immoo faarfannaa Daawit irratti barreeffameera, “Gooftaa gooftotaa amma nu fayyisi.”  Jedhamee barreeffameera (Faarsaa 117(118) :25).

Aariyaam:- jechuun immoo bultoo Waaqa keenyaa kan ta’e samii ilaallata, egaa haaluma kanaan kan samii irra jiru samiirras kan jiraatu Gooftaa keenya ati nu fayyisi jechuudhaan faarfatan. Faarfannaa kana karaa lamaan ilaaluun ni danda’ama. Karaa inni tokkoffaan bittaa Roomaa keessaa nu baasi jechuu yeroo ta’u inni lammaffaan ijoo ta’e immoo du’a foonii fi lubbuu jalaa nu baasi jechuudha. Faarfannaa kana keessattis kan dabalamee Ilma Daawit kan jedhu ture, kuni Ilma Waaqaa ykn Masihii ta’uu isaa uummatni beekuu isaanii hubachiisa. Wangeela Maatiwoos 12:23, 20:23, 30, 22:41, 9:3.

Kunis egaa walumaa galatti Daawitiif kakuun Waaqni keenya galeef raawwachuu isaa ibsa. Mootummaan Israa’el mootummaa Waaqayyoo turte.Ajaja uumaa hundaa kan ta’e Gooftaan keenya Waaqayyo waan ta’eef Addaam irraa jalqabee hanga yeroo Saamu’eelitti uummata kan ajajus ta’ee kan dursu jecha kakuudhaan dhiiga sanyii keessa darbuun jiraatan bara baraa fi abbaan hundaa Waaqa ta’uu isaatiif ajaja ykn mootii hin qaban turan. Bara Saamu’eel garuu uummatni Israa’el akka jara Waaqatti hin amannee (Ahizaab) mootii barbaachuudhaan Saamu’eel mootii keenya ta’i jechuun gaafatani. Saamu’eelis gara Waaqayyoo yeroo gaafatu siin osoo hin ta’iin anaan tuffatani mootii qopheessiif jedheen; Saamu’eelis mootiin keenya Waaqayyo waan ta’eef isinitti haa hafuu jedhus uummatni jalaa qabuu hin dandeenye. Eegduu harree kan ta’e Saa’oliin mootii godheef  Waaqayyo akka mootii ta’u uummatni hin jaalanne kanaafuu eegduu harreetu mootii ta’eef.

Mootummaan Saa’olis ni hafe. Waaqayyoos  Saa’ol osoo jiruu akka fedhii isaatti uummata kana ajajuu danda’uuf mootummaa isaa kan ifa ba’u aangoon Daawitiif akka kennamu godhe. Mootummaan Daawitis mootummaa Waaqayyoo turte. Daawitidhaan sanyiikee irraa kan dhufu ilmoon kee aangoo kee irra ni taa’a jedhee yeroodhaaf Salamooniif ta’ullee dhumni isaa garuu Gooftaa keenya Iyyasuus Kiristoos sanyii isaa irraa akka dhalatu kakuu galeefii ture.

Oduu gammachiisaa qulqulluu Gabri’eeliin akka harmee keenya Maariyaamiitti himetti Wangeela Luqaas 1:33 barreeffameera. Kanaafuu haala dhoksaadhaan daddarbaa kan ture mootummaan Waaqayyoo Ilma Waaqayyoo ykn Gooftaan dhalachuudhaan ifa ba’uu isaa ibsuudhaaf  abbootiin keenya mootummaa  Daawit jechuudhaan faarfatan. Haala kanaan Masihiin gara Iyyaruusaalem  yeroo galu kuni eenyu jechuudhaan uummatni gaafatan.kun Galiilaa Naazireet irraa kan dhufe Iyyasuus jedhani.  Kana boodas bakka mana amantaa isaa galuun mana amantaa isaa keessatti daldala adda addaa gaggeessaa kan turanii fi dhaabiiwwan daldalaa keessa darban ari’ee manni koo mana kadhannaati malee mana daldalaa miti jechuudhaan ifa baasee dubbate.

Bakka sana kan turan jaamota hunda fayyise, dhukkuboota adda addaatiin kan qabaman hunda illee ni fayyise, haa ta’u malee mana amantaa isaa keessatti badiiwwan adda addaa kan hojjetaa turan kan sammuun jaaman jara osoo hin fayyisiin darbe, ilaalcha jaraa dabaa ta’e sanas osoo hin sirreessiin darbe.

Gooftaan keenya Iyyasuus Kiristoos achuma osoo jiruu ijoollotni faarfannaa jalqban barattonnis jara wajjin Hoosaa’inaa jechuudhaan faarfatan. Warreen ajaja daldalaa sana kan turanis iji jaraa dhiiga uffatee lapheen jaraas hinaaffaadhaan guutame waan jarri jedhan dhaga’aa jirta mitii? Callisaa jechuun gaafatan, Gooftaan keenya Iyyasuusis yoo jarri callisan illee dhagaan afaan baasee ni faarfata jechuun deebise. Achumaanis faarfannaa Daawit irratti’ ijoollee harma hodhan irraa faarfannaa ofiif qopheessite’kan jedhu hin dubbisnee jechuun isaan gaafate (Faarsaa 8:12). Sammuu qabeessa warra jedhan lapheen jaraa daabiloosiin yeroo cufamu lapheen ijoollotaa garuu faarfannaa gadi yaasaa ture.

Egaa nuus akka ergamoota isaa laphee ajajamaa fi sammuu qulqulluu qabannee guutummaa guututti amannee waa’ee seenaa lafa kanaas dhiisnee isa duukaa yoo buune Waaqni keenya qulqulluun yeroo gaabbii nuuf kennuusaadhaan gara isaatti akka deebinu nuuf eeyyamuu isaa dagachuu hin qabnu. Waan tokko of  eeggadhu du’a gaabbii malee, waan tokkos gammadi sanyii Daawit ta’uu kee, qophaa’anii jiraachuun abshaalummaadha jedhan; gaabbii fi eegeen immoo booda dhufti jechuun hin oolu.

Ani garuu akkasan jedha mee guyyaa tokko keessa sa’a 24 tu jira. Yeroo kana keessa Waaqakee bara baraan kan jiraatu yeroo ati raftullee kan hin rafne yeroo ati deemtu kan si duukaa deemee si eegu nyaata kee fi uffannaakee kan siif qopheessu yeroo  kee ykn sa’a hangam kennitaaf? Akkas jedha dura ija kee keessa kan  jiru xurii osoo hin baasiin kan obboleessa keetti quba hin qabiin, dhuguma dura of gaafachuun gaariidha haalli amantaa fi jireenya koo akkami jechuun gara jaalala Waaqayyoo ibsa waan hedduudhaan kan qabamnee jiraaannu hedduudha, kanammoo of beekna haa ta’u garuu hunda hin dubbatani dugda hin dhungatani jedhu abbootiin keenya, afaaniin qofa osoo hin ta’iin hojiidhaanis jaalala Waaqa keenyaa agarsiisuu qabna jechuudhaan yaada koo asirrattan gabaabsa.

Galatni Waaqayyoof,Harmee Keenya Qulqulleettii Maariyaamifis Haa tahu. Ameen.

Kitaabota Wabii

Ø Kitaaba Tokkoffaa barsiisaa Li’ule Qaal Akaaluu haala Amantaa Ortodooksii

Ø Macaafa Qulqulluu

Torbee Torbaffaa: Niiqoodimoos

Maqaa Abbaa Kan Ilmaa Kan Afuura Qulqulluu Waaqa Tokko Ameen!

                                           Eng. Taaddelee Mekonninin

“Garaa koo keessa qortee halkanis dhuftee yoo na ilaalte, keessa koos garagalchitee yoo fonqolchite, hamaa yaaduu koo hin argitu; dubbii afaan kootii keessaas irra-daddarbaan hin argamu." 

                  Faarfannaa 16(17):3

  Maatiin Waaqayyoo Ijoolleen Haadha teenya Qulqulleettii Dubree Maariyaamii jaalatamtoonni Ergamtootaa, Wareegamtootaa fi Toltootaa Hundi Maqaa Waaqayyootiin iddoo jirtanitti akkam jirtu? Ameen Maqaan Waaqayyoo uumamtoota Isaa hunda biratti bara baraan kan eebbifamee fi kan qulqullaa’e nuuf haata’u!

  Yaa maatii Waaqayyoo, torbeewwaan darban keessa moggaasa torbeewwaan sooma guddaa hanga jahaffaatti ilaaluun keenya ni yaadatama. Torbeen kuni ammo Niqodimoos jedhama. Qulqulluu Yaaredis torbee kanaaf faarfannaa akkas jedhu qopheesseera

“Namni Niqoodimos jedhamu gara gooftaa Iyyasuus ni adeeme, yaa barrsiisaa, barsiisuudhaaf Abbaa kee bira akka dhufte sitti ni amanna jedhe, Ilmoo leencaa rafte, mugdes, yeroo du’aa ka’uutti ana kaasi”

  Niqoodimoos (Torban 7^ffaa Sooma Guddichaa)

 Niqoodimoos hayyuu amantiiti; nama baay’ee barate baay’ee beekesidha. Kanarraa kan ka’es hayyuu, beekaa, dursaa jedhamee waamameera. Namoota jabana sana turan keessaayiis nama beekkamtii fi beekumsa olaanaa qabu ture. Halkan gara Gooftaa Iyyasuus Kiristoos dhufaa barachaa ture-barataa halkanii ture jechuudha. Niqoodimoos guyyaa guyyaa barsiisaa mukuraabii ta’ee namoota baay’ee barsiisaa waan ooluu fi warri Yihuudotaa Niqoodimoos barsiisaa ture Gooftaa waan hin amaniniif (hin fudhatiniif) guyyaa guyyaa barachuu hin dandeenye. Akka seera warra Yihuudotaatti namni Gooftaa fudhatee (amanee) fi duuka bu’e mukuraaba isaanitii waan ari’amuuf isaan mufachiisuu dhabuuf jecha halkan barachaa ture.

    Niqoodimoos Gooftaadhaan,”Yaa Barsiisaa hoo, Waaqayyo yoo isa wajjiin ta’e malee mallattoolee ati raawwachaa jirtu kana kan raawwatu hin jiruutii Ati Waaqayyo biraa barsiisaa taatee akka dhufte ni beekna” jechuudhaan ragaa ba’eef. Gooftaanis deebisee, ”Dhugaa dhugaan siin jedha namni lammata yoo dhalate malee Mootummaa Waaqayyoo arguu (dhaaluu) hin danda’u”  jedheen. Niqoodimoosis waan isaaf hin galiniif, “Namni erga dulloomeen booda akkamiin dhalachuu danda’a? Lammata gara gadaamessa haadha isaa seenee dhalachuu ni danda’aa?” jedheen. Gooftaa Iyyasuusis deebisee akkas jedheen,”Dhugaa dhugaan siin jedha, namni bishaanii fi Afuura Qulqulluu irraa yoo dhalate malee gara Mootummaa Waaqayyoo seenuu hin danda’u. Kan foonirraa dhalate foon kan Afuurarraa dhalates afuura ‘(jechuunis kan namarraa dhalate ilma namaati ilma Waaqayyoo ta’uuf Afuurarraa dhalachuu qaba jechuudha).’ Lammata dhalachuu qabdu waanan siin jedheef hin ajaa’ibsiifatin. Qilleensi gara barbaadetti bubbisa (qilleensa’a); sagalees ni dhageessisa; garuu garamii akka dhufe garamis akka deemu hin beektu; kan Afuura irraa dhalate hundi akkuma kana” jechuudhaan Waaqayyoorraa dhalachuun hangam akka iccitii cimaa ta’e hubachiise. Niqoodimoosis deebisee akkas jedheen, ”Kun akkamiin ta’uu danda’a?” Gooftaa Iyyasuusiis deebisee akkas jedheen,”Ati barsiisaa warra Israa’elii taatee kana hin beektuu? Dhugaa dhugaan siin jedha waan beeknu ni dubbanna; kan argines ragaa ni baana; ragaa ba’iinsa keenyas hin fudhattan. Waa’ee biyya lafaa yommuun sitti himu kan hin amanne waa’ee isa samiidhaa yoon sitti hime akkamiin amantu? Samiirraa kan bu’een alatti gara samii kan ba’e eenyumtiiyyuu hin jiru; Innis samiirraa kan bu’e Ilma Namaa qofaadha” jedheen. Niqoodimoosis gaaffii isaa achumarratti dhaabe. [Wangeela Yohaannis 3:1-15]

Nuti kanarraa maal baranna?

1^ffaa Yeroo boqonnaa keenyaa eessatti dabarsuu akka qabnu nu barsiisa.

  Niqoodimoos gara Gooftaa Iyyasuus Kiristoos dhufee barachuun isaa gocha barbaachisuudha (deeggaramuudha). Sanyiisaa kanneen ta’an warra Yihuudotaa osoo Isa hin hordofin Niqoodimoos Gooftaa jaallachuun waan nama dinqisiisuudha.

  Niqoodimoos kan galgaleeffatu Gooftaa bira; sa’aa muraasa boqonnaaf qabu Uumaasaa biratti dabarsa. Kun immoo carraa guddaadha. Guyyaa guyyaa barsiisaa fi dadhabaa waan ooluuf galgala boqochuu qaba ture. Niqoodimoos garuu mana koottan galee boqadha hin jenne; sooressaa fi abbaa aangoo ture. Uummanni dhimmaaf karrasaa dura marmaaru turan. Haata’u malee isaan wajjiin hin halkaneessine.

 Egaa abbaa kanarraa barumsa guddaa barachuu qabna. Nuti har’a kan halkaneessinu eessaa? Eenyu waliin halkaneessina? Maal hojjachaatii? Niqoodimoos garuu kan halkaneessu Barsiisaa dhugaa bira. Niqoodimoos tolummaa fi sukaa baatee gara manasaa gala ture. Nuti hoo yommuu gara mana keenyatti gallu kabajamneeti moo? Ulfaanneeti moo salphanneeti laata?

   Namni si’anaa machaa’atii, dhiichisaatii, madaa’atii, dhiigatii, maraachatiidha kan gara mana isaatti deebi’u. kanneen mana jiraatanis hirriba argatuu laata? Ni du’aa laata? Jechuun dhiphachaa isa eegu. Kanneen du’anis jiru. Halkaneessuun akka Niqoodimoos Gooftaa wajjiin malee.

2^ffaa Faayidaa Cuuphaati baranna.

v Cuuphaan Qulqulleettii Sillaasee irraa Ilmummaa ija fooniitiin hin  muldhanne argachuuf.

   Niqoodimoos Gooftaa wajjiin halkaneessuun Uumaa isaa bare. Gooftaa baruu qofti immoo gahaa miti. Beekuu seexannis ni beeka. Afuura Qulqulluurraa dhalachuu barbaachisa. Addaam baala hin nyaatiin jedhame battala nyaatetti Ilmummaan Waaqayyoo irraa mulqamee (fudhatamee) ture-Gooftaan dhufee lammata hanga nama nutaasisuutti ilmaan seexanaa taanee isaan dhiitamaa garbicha isaas taanee turre. Sanaan booda garuu galatni Gooftaa Iyyasuus Kiristoosiif yaa ta’uutii dhiirri guyyaa afurtamatti dubarri guyyaa saddeettamatti gudeeda Afuura Qulqulluu fi gadaamessa Yoordaanosiitii dhalanneerra. Abbaa keenya kan Isaan jennuufis kanarraa kan ka’eeniidha. Isarraa erga dhalannee fi Ilmummaa Isaa erga arganneen booda garuu waanjoo cubbuu fi garbummaa seexanaatiin lammata akka hin qabamne kabajnee fi cimsinee qabachuu qabna. Addaam jalqaba Gannataa waan ari’amu hin seene ture; seexanni isa dogongorsiiseera. Nutis lammata waanjoo seexanaatiin qabamnee Ilmummaa Sillaasee akka hin haqne (hin dhabne) of yaa eeggannu.

    Ilmummaan baay’ee keenyaa akka Eesaawu ittoo missiraatiin nurraa mulqamaa (fudhatamaa) jira. Baay’een keenya har’a moofomneerra. Niqoodimoosis moofa’ee ture garuu Cuuphaa fi Gaabbiidhaan jireenya haarawa gonfateera. Jireenyi isaa inni moofa’e laliseefii jira. Nutis jireenya keenya isa moofa’e (xuraa’e) gaabbiin, Foonii fi Dhiiga Gooftaa keenya Iyyasuusiin yaa haaromsinu. Yoo kun ta’eedha Mootummaa Waaqayyoo kan dhaallu.

v Maqaa Kiristoosiitiin kiristaana Maqaa Ilmaan Ijoollee Waaqayyoo kan nu jechisiisus cuuphaadha. Cuuphaan tunis ishee takkittii Kiristoos tokkichi ittiin waaqeffatamu kan amantaa takkittii (mana amantaa takkaan) kan raawwatamu malee waldaalee amantoota garagaraa keessatti kan argamtu miti [Efeesoon 4:5].

v Kiristaana jedhamuuf guyyaa Jimaataa cinaacha mirgaa Gooftaa keenya fi Fayyisaa keenya Iyyasuus Kiristoos irraa bishaan dhangala’e “Bishaan Jireenyaatiin” cuuphamuun ijoollee Waaqayyoo jedhamuutu nurraa eeggama. Bishaan kana eessaa argattu? Kan jedhu yoo jiraate, lubni bishaan saayiniitti (gabateetti) qicee (naqee) kitaaba kiristinnaa jedhamu irratti kadhata (dubbisa); sirna qulqulleessuus (qiddaasee) irratti raawwata. Dhumarratti Abbaan tokkichi Qulqulluudha, Ilmi tokkichi Qulqulluudha; Afuurri Qulqulluun tokkichi Qulqulluudha jechuun bishaanicha ni eebbisa. Battala sanatti bishaanichi gara bishaan guyyaa Jimaataa cinaacha Gooftaa Iyyesuus Kiristoos irraa dhangala’eetti geeddarama. Isaanis cuuphamnee gidiraarraa ni qulqulloofna; bittaa fi hidhaa seexanaarraayis ni bilisoomna.

  Waaqni abbootii keenyaa akka ajajaa fi jecha Isaatti deddeebinee dhumarrattis dhaaltuu mootummaa Isaa waamtuu maqaa Isaa akka nu taasisuuf arjummaan Isaa gargaarsi, kadhannaanii fi waadaan Toltootaa, Qulqullootaa fi kan haadha teenya Dubaroo Maariyaamii nu wajjiin haata’u bara baraan ameen!

Wabii:-

Ø Macaafa Qulqulluu Afaan Amaaraatiin Waldaa Kitaaba Qulqulluu Itiyoophiyaa, bara 2000 A.L.I.

Ø Utubaa amantaa maxxansaa 9^ffaa barsiisaa Birhaanuu Goobanaa, bara 1997 A.L.I.