Maqaa Abbaa kan Ilmaa kan Afuura Qulqulluu Waaqa Tokkoon.Ameen!
Barsiisaa Hayile Mikaa’el Taaddasaatiin (zeh.michael@gmail.com)
Kutaa
1ffaa
Amma waqtiin waqtii
birraa ykn abaabooti.Yeroon kuni dhugumatti qaamni dachee kamiyyuu hongeenillee
otoo hin hafiin abaaboodhaan miidhagee yeroo itti magariisni dachee uwwisuu
dha. Yeroon kuni yeroo itti abdii adda ta’e
horannuu fi jijjiirrama wayyuuf itti onnannuu dha.
Waqtiin abaaboo kuni
akkataa dhahaata Mana Kiristaanaa keenyatti,
bu’uura Liqakaahinaat Kinfa Gabri’eel Altaayyee barruu ayyaana Masqalaa sababbeeffaachuun teessoo
Paatryaarkii Xaqlaay Beetakhinatiin qophaa’erratti ibsaniin, Onkoolooleessa
bulti 26 hanga Sadaasa bultii 6 kan turuu dha[Bamasqaluu Gannatin
kaffata:2003:fuula 15]. Otoo waqtii abaaboo kanatti hinseeniin xumuura gannaa
fi seenasa Birraarratti ammoo durii eegalee, ayyana Abaaboo jedhamee fulbaana
25tti iddoo amantoonni, mootii fi Phaaphaasiin argamanitti qabeentaan Kitaaba
Qulqulluu waqtii kana waliin roguummaa qaban dubbisuu fi hawwii gaariif abaaboo
walii laachuudhaan ayyaanichi ni kabajama. [Bamasqaluu Gannatn Kaffata:2003:15]
Akka Mana Kiristaanaa
keenyatti, waqtii kanatti Wangeelli Maateewoos qabeentaan isaa kan mata duree
keenya hammatu, boqonnaa 6: 28-30 ni dubbifama. Faarfannoon Daawiit “barri keenya akka margatti, akka abaaboo
daggalaattis ni daraara, yemmuu bubbeen itti bubbisuus ni darba.” jedhuunis
jireenyi adduunyaa kanarraa yeroof qofa akka ta’e yaadaachuun abdii fi jireenya
wayyuuf of qopheessuun deemuuf Kiristoos waliin jiraachuuf hawwuu akka qabnu
yeroo itti yaadachiifamuu dha.
Caqasni “Abaaboo Hongee
Ilaalaa” jedhu kan argamu, kutaa Kitaaba Qulqulluu Lallaba Tulluu[The Sermon on
the mount] jedhamee beekamu keessatti. Mooggaasni kuni Wangeela Maateewoos
boqonnaa 5-7tti qabeentaa Kitaaba Qulqulluu jiran kan uwwisuudha. Kanaaf
ka’uumsa kan nuuf ta’u, jecha “uummata
baay’ees yoo argu gara tulluutti ol
ba’e” jedhuu fi bu’uura jecha kanaatiin tulluurratti barnootni boqonnaawwan
kanneen irratti safaran laatamuu isaanii dha. Tulluutti ol ba’ee, hanga dhuma
boqonnaa 7tti kan barsiise jechoota bu’uuraalee kakuu haraa jedhamuun beekamanii
dha. Poop Shinoodaa 3ffaan kitaaba isaanii, “Contemplations on The Sermon on
the mount” jedhurratti,[1991: 11, 12 fi13] Gooftaan uummata baay’ee kana yoo argu sababoota tulluutti ol ba’eef, jedhanii kan ibsan
ka’uumsa godahachuun qabxiiwwan muraasa tarreessineerra.
v Dhaggeeffattoonni
hafuurawaan akka ol ba’uun dhageeffatan, jechoonni samii kanneen fixee tulluu
ol jedherratti laatamuu qabu. Sababni isaas namni tulluurra taa’e, dhimma
dacheerraa akka waan xiqqishuu fi yartuutti hubata waan ta’eef. Akkasuma
ilaalchaanillee ol qaaari’anii qaariinee barnoota bu’uurawaa kana hubachuu akka
qabanii fi akka qabnu yoo isaanii fi nutti agarsiisuu dha.
v Akkuma
ajajoonni Kakuu Moofaa Tulluu Siinaatti kennaman[Ba’uu 19:3], ajajoonni
bu’uurawaa Kakuu Haaraa , isa durii irratti kan hundaa’an, ajajoota Tulluu
Siinaa yaadachiisuudhaan tulluurratti kennamuu waan qabaniif.[Ibr. 12:18-24]
v Iddoo
qalbiin namaa fi yaadni namaa hin hatamnetti jechoonni kanneen himamuu qabu.
Maar yishaaqa bu’uura jedhaniin, jireenyi gadaamii[gammoojjii, hongee] fedha foonii onneen keenya deddeebisu ni haqa
waan ta’eef [“a mere look at the wilderness can mortify the worldly desires in
the heart.”] gara tulluu homtuu itti hin jirreetti ol ba’e.
Akkuma waliigalaatti
Gooftaan yemmuu barsiisu, tulluu, laga qarqaraa fi haroowwanitti baasee sababni
itti barsiisuuf, dhimma foonii adduunyaa kanarraa bilisoomsee bu’aa kanaatiin
ammoo jaalala isaatiin kan ijaarraman akka ta’anii dha.[H.H.Pope ShenoudaIII
:1991: 11] Kanaaf mitii ree Abirhaamiin biyya isaa, uummataa fi mana Abbaa isaa
dhiiseee akka ba’u kan isa ajaje.[Uum.12:1]
Eegaa sababoota armaan
oliif akkuma Gooftaan uummata baay’ee yoo argu, gara tulluutti ol ba’etti,
uummata baay’ee of fulduratti yoo ilaallu, tajaajiltoonni Mana Kiristaanaa,
uummatatti daandii dhugaa itti agarsiisuuf, ibsaa tulluu irraa ta’uun,
hoggantuumma fakkeenya ta’een, socho’uu qabna[Maat.5:14] Warri beekuumsa
adduunyaa kanaaf carroomne, beekuumsa keenyaan akka isa furru, warri waan
uummanni kuni jiruuf hojjannee soroomuu dandeenye, qabeenya keenya dilbii
kanarraa, maddee ishee qunxurree,
uummanni baay’een waan nyaatamuufi dhugamuuf akka hin waa’echine
gochuun, warri angoo siyyaasaatiin uummata bulchaa jirru, uummata danuu kana
yoo agarru, imaanaan nuuf laatame salphaa akka hin taane hubannee, gaaruummaadhaan bulchuuf, haala uummaticha
Mootuummaa Waaqayyootti akka qaari’u gochuu nu dandeessiisuun tulluutti ol
ba’uu qabna. Keessattuu yeroo kanatti uummatni baay’een hongee hafurawaa keessa
yemmuu jiruu fi, yeroo dammaqiinsa
hafurawaa barabaaduutti akkasumas namoonni yeroo ofittuummaan
liqimfamanitti waa hundaan ol ka’uu
qabna.
Gooftaanis akkuma
cuphameen hongee[gadaamii] Qorontoos keessa guyyaa afurtama soomanaan turee,
tulluurrati diyaabiloosiin qoramee, tulluu qorumsaa kanarraa gara tulluu
lallabaatti, tulluu lallabaarraa tulluu zayitaatti [namni hundi gara mana
isaatti gale. Gooftaan iyyasuus garuu gara tulluu zayitaatti deeme][Yoh.7:53 fi
8:1] ce’aa ture.
Tulluurratti dhiigni
Gooftaa gadi nammee jira. Tulluurratti fannifamee jira. Tulluudhuma kanarratti
warra isa mormaniifillee dhifama laatee jira. Tulluurratti Gooftaan kabaja
qabuu fi hariiroo Abbaa fi Hafuura Qulqulluu wajjiin qabu agarsiisee jira.
Tulluurratii Gooftaan Iyyasuus gara Abbaa isaatti ol ba’ee jira. [Maar. 9:7 Hoj.
1:9,12]
Abaaboo akka ilaallu
kan nu affeeru waa’ee nyaataa fi daaraa dhiphachuu akka hin qabnee fi kanaa
dhiphachuu mannaa dhugoominaa fi mootuummaa isaa dursinee heeduu akka qabnu nu
gorsuudhaaf.[Maat.6:33]
Abaaboo hongee gaafa
ilaallu lafa homaa hin biqilchinee fi kunuunsi hin godhamneef irratti rooba
taliila isaa fi qabbana aduu isaatiin biqilanii miidhaganii kan mul’ataniidha.
Kunuunsa tokko malee, arjoomina Waaqayyootiin haala kanaan miidhaganii
dacheerratii afamuu isaanii yoo ilaallu, waa’ee Waaqaa akkana nuun jedhu.
1.
Waaqayyoon
Uumaa fi sirneessaa uumamaati
1.1.
Ilaalcha
falaasootaan
Birraa kanatti dacheen
jiidhaa fi ililliin miidhagdee yoo agarru, akka waliigalaatti gaafii kaasuun
keenya hin oolu. Adduunyaan kuni eenyuun akkanatti miidhagdee hojjatamte?
Eenyuutu waqtiilee jijjiira? Eenyuutu rooba roobsee, aduu baasee, midhaan
bilcheessee ilma namaaf arjooma?gaafiiwaan jedhan sammuu keenya galoo
gaafiitiin guutu isaanii hin oolu. Falaasoonni muraasni adduunyaan tuni akka
abbaa hin qabne yoo dubbatan kaan ammoo adduunyaan tuni kaayyoo fi abbaa
akkasumas galma uumaa ishee qabattee kan sochootu akka taate dubbatanii jiru.
v Warri adduunyaan uumaa
malee dhuftee, kaayyoo malee sochooti jedhan
Garee qo’annaa
Koosmooloojii[cosmology][Saayinsii waa’ee Yuunivarsii qo’atu] , keessatti warri
yaad rimee Meekaanizimii hordofan, adduunyaa kanarratti wanti arginu hundi isaa
sababaan kan ta’uu fi wantoonni hundi sababaa fi bu’aadhaan kan walitti
hidhaman akka ta’an, wanti bu’aa ta’e sababa ta’ee, wanti sababa ta’u bu’aa ta’ee
adeemsa itti fufu keessatti wantootni hundi akka uumamanii fi badan[Yaflsfinnaa Timhrt, Yamaana
Gabramaaryaam:1954, fuula 219 fi 220]
adduunyaan kuni haala kanaan otoo addaan hin citiin akka cincalaatti wal
qabatee walitti hidhamee walitti hirkatee akka itti fufu
dubbatu[Yamaana:1954:220] Adduunyaan bal’aan haala kanaan itti fufu garuu,
qo’atame, qoratamee kaayyoo tokkoof jedhamee wanta hojjatame otoo hin taane, wanti
hunduu akkuma itti dhufeeti sababa adda addaatiin dirqamee kan raawwatamuu akka
ta’e dubbatu. [Yamaana:1954: fuula 220]
Bara durii keessaa
yaada kana warri deeggaran, Deemookraatasii fi Leefkippoos yoo ta’an, isaanis
addunyan kuni wantoota xixiqqoo atamoota[atoms] jedhaman walitti qindaa’uun kan
hojjatamee fi atoomoonni kanneenis kan uumaman ofiin, humna isaanii kan
keessaatiin akka ta’ee fi kanneen hundi kaayyoodhaan otoo hin ta’in
akkanumatti, dirqama uumamaa fi sababoota adda addaatiin kan raawwataman akka
ta’e dubbatu.[Yamaana:1954:220 fi221]
Bara hammayyaa kanatti
deeggartoonni yada kanaa Falaasaa Ingliz Fraansiis Beekan faan uumama adduunyaa
keessatti, kaayyoo wanti jedhamu soba akka
ta’ee fi wanti hundi kan ta’u sababa duubaa isa dhiibuun akka ta’e ni dubbatu.
Hiyum falaasaan jedhamus, yaadni isaa kanaan adda miti. [Yamaana :1954:fuula
221 fi22]
Laamaarkii fi Daarwiin
Falaastoonni jedhamanis, ogummaa, bareedinni fi yaadni uumamaan mul’atu uumamni dura ture isa dhufuuf muxannoo
dabarsuu fi inni ammaas qabsoo jireenyaa, filannoo isaatiinii fi naanno isaa
irratti hundaa’ee jijjiirama dhufuudha malee, kaayyoo kan jedhamu akka hin
jirree fi uumamni waan goodhu sana otoo hin beekin akkanumatti qofa yaadaan
akka waan hojjatamteetti wantoota adda addaa yoo raawwattu akka mul’attuutti
himan[Yamaana:1954: fuula 222fi 223]
Eegaa falaasamni kuni
Waaqayyoo uumaa ta’uu isaa dagatee, uumama kanas kan sirneesse bulchu akka isaa
ta’e kan irraanfateedha. Armaan gaditti yaada kana madaaluun keenya akkuma
eeggametti ta’ee, mee warra falaasama tilooloojiizim hordoofan haa ilaallu.
v Warri Adduunyaan tuni
Abbaa qabdi, kaayyoon sochooti jedhan
Warri falaasama
tiloloojiizim hordofan ammoo, warreen ilaalcha meekaanizimii adduunyaan tuni
kaayyoo malee sababaan asii fi achi raafamti jedhanii falmaniif, yaadni kuni
fudhatama akka hin qabnee fi adduunyaa kana sirriitti yoo qalbeeffanne galma
tokkorra ga’uuf wanta tattaaffachaa jirtu akka taate falmu[Yamana:1954:fuula 224]
Uumamni fi hojiin isaas akkuma tasaa ofiin kan raawwatame otoo hin ta’in
ogummaa fi kaayyoodhaan wanta hojjatamee dha. Kanneen hojii namaarrattis ta’ee,
wantoota uumamarratti mul’atanirraa mirkaneeffachuu akka dandeenyuus ni
adeessu. Biqiltootaa fi bineensoota yoo ilaallu tokkoon tokkoon isaanii ilma
namaa fi adduunyaa maraaf hojii ajaa’ibsiisaa fi faayidaa qabeesssa ta’aan akka
hojjatan, qaamni isaanii hundi hojii malee kan taa’u akka hin jirree fi
adduunyaan kaayyoo qabattee galma wayiitti akka imaltu godhee kan uume humni
tokko akka jiru falmu.[Yamaana:1954:225]. Humni kunis sammuu kan qabuu fi mala
qabeessa kan ta’e, adduunyaadhaan ala kan ta’e ta’uu akka qabu, isas Uumaa ykn
Waaqa jennee waamuu akka dandeenyu; kana ta’uu baannaan wantoonni danuun ajaa’ibsiisaa
ta’an kuni gatii akka hin qabaanne falmu[Yamaana:1954: 225]
Falaasoonni
Anaaksgoraas, Soqraaxas, fi Plaatoon wanta
ajaa’ibaa akkana jiru kana sammuun uumuu danda’e jiraachuu akka qabu, akkuma
waliigalaatti hojiin oguummaa fi yaadni adduunyaarratti agarru uumaan tokko
akka jiu hubachuuf akka nu gargaaru; adduunyaa kanarratti ogummaa arginuuf
kanaan ala deebiin qufsaa biroo deebi’uu akka hin dandeenye ibsu.[Yamaana:1954:
225] Kanneen keessaa Anaasgooraas fi Pilatoon garuu adduunyaan uumaa ykn
hojjataa ni qabdi kan ishee jechisiise qindoomina of keessaa qabduun malee,
atamoonni[atoms] adduunyaan ittiin hojjataman, wantoonni bu’uurawaa hojjataa
tokkoyyuu akka hin qabne ni dubbatu.[Yamaana:1954:225 fi 226] Akka Aristootilitti
ammoo, adduunyaa kanarratti wantoota agarru hundaaf, hojii oguummaa ol jedhanii
mul’atanii fi hin hallamne arguu akka dandeenyu; hojiiwwan ogummaa kanas, akka
tasaa, kaayyoo malee akka waan galma
ga’aanitti yaaduun gonkuma hin danda’amu. Hojii akkanaa raawwachuuf sammuun
baay’ee dadhabe jiraachuu akka qabu dubbata. Kunis Kaayyoodhaan Waaqni adduunyaa
kana uume akka jiru nutti agarsiisa. [Yamaana:1954: 227]
1.2.
Madaallii
kitaaba Qulqulluutiin
Eegaa falastoonni
kanneen akka Beergsan wanti tokko argamsiisaa malee yeroo baay’ee booda ofuma
isaatiin uumamuu akka danda’u kan dubbatan, kan nama hin amansiisnee dha. Sababni isaas, homtuu
otoo hin jiraanne homtuu waan hin argamneef, homaa irraa kan argamu
homaadhuma.[Out of nothing nothing could exist, Ex nihilo
nihil.est.][Yamaana:1954:235] Kanaaf wantoota qajeeluu,[ keessattuu ilaalchi
Anaasgooraasii fi Pilaatoo] qaban qabaachuun isaa akkuma eeggameetti ta’ee, ilaalcha
teelooloojiizimitiin adduunyaan kuni uumaa akka qabuu fi kaayyoon kan sochoo’u
akka ta’e falmiin ka’u amansiisaa dha. Argamuu waan tokkoof sababni ni jira
warri jedhanis sababni ammaa sababa duraarratti hirkachuun cincala dheeraa
booda, dhumarratti homaa kan isa sochoosu kan hin qabne, humna sochoosaa isa
duraa [prima causa, prime cause]bira ga’uu dandeenya.[Timihirta Hayamaanoot
Innaa Kiristiyaanawii hywat:Liqa Gubaa;ee Abbaa Abarraa Baqqala:25] Kanaaf
sababni qufsaan duraa[first efficient cause] akka jiru yoo wal amanne, sababa
qufsaa duraa kanaan Uumaa jenna jechu dha.[Timihirta Haymaanoot: Dn Birhaanuu
Adimaas: 1996: 97]
Madaallii kitaaba
Qulqulluutiin abaaboo dachee yoo ilaallu, jijjiirrama waqtiilee yoo
qalbeeffannu, ba’uu fi seenuu aduu,
samiin faayaa addeechaa fi urjiin yoo miidhagdu, akka waliigalaatti
taateewwaan keessa ilma namaa fi adduunyaa kanarratti raawwataman yoo agarru,
adduunyaan tuni uumaas ta’ee, ammaan tana sirneessee kan ishee bulchu akka
qabdu ni hubanna. Kitaabni Qulqulluun, “Bantiiwwan Samii kabaja Waaqayyoo ni
dubbatu”[Faar.18:1] kan nunn jedhu kanaafi.
Kana jechuun uumama ykn ababaoo hongee qalbeeffannee yoo daawwannu,
humni uumamaan ala ta’ee fi ofii kan hin sochoone, isa jijjiirarmni kan hin
jijjiirre, ofii kan waan hunda jijjiirruu danda’u[the unmoved mover] akka jiru
nutii himu. Dhugaadha Waaqayyoo yoo kana uumu kan waliin uume, kan waliin
adduunya kana qajeelche hin jiru, inni amalummaa isaatiin kan hin mul’anneedha.
Isa waliin kan uume jiraachuus baatu, “ inni amalummaa isaatiin kan hin
mul’anne ta’us, uumaa adduunyaarraa eegalee kan hojjatamaniin ifa ta’ee
mul’ata”. Garuu uumama isaatiin Uumaa
isaanii Waaqayyoon warri raajeeffachuu dadhaban, uumama isaa keessatti
hojiin Waaqayyoo ajaa’iba akka ta’e arganiillee, “Waaqayyoon akka Waaqummaa isaatti waan hin
kabajnee fi hin galateeffanneef sababa dhaban...yaadni isaanis gatii dhabee,
sammuun isaanii qalbeeffatuus dukkanaa’e[Rom.1:20-22]
Ilmi namaa waqtii
kanatti abaaboo hongee ilaaluun isaa Waaqayyoon beekuu baachuu isaaf sababa isa
dhabsiisa; haala uumamaa nama qalbeeffateef, barsiisaa tokko malee waa’ee
Waaqaa afaan baasaniit ragaa ba’u waan ta’eef. Kaayyoon uumamani itti uumame
keessaa inni tokko waa’ee isaa akka nutti himaniif akka ta’e, Luqaas, hojii
dukaa bu’ootaa irratti “Kana hunda waliin waan gaarii hojjachaa samii irraa
rooba, waqtiiwwan firii itti buusanis yoo nuuf kennu, onnee keenya
gammachuudhaan yoo guutu, ofii isaa ragaa malee hin dhiisne” yoo jedhu harki Waaqayyoo waan agarru kana hunda akka
godhee fi lubbuun[jireenyi] namaallee harka Waaqaa akka jirtu nutti himaa jira.
[Iyy.12:7-10]
Yoo abaaboo hongee
ilaalu, Waaqayyoon adduunyaa kana uumuu fi sirneessuu isaa, ilmi namaa hundi
keenya sababa sammuu keenyaa fayyadamuun irra ga’uu ni dandeenya. Sammuun
keenya uumamaan seera barreeffame tokko malee gaarii fi yaraa addaan baasnee
akka beeknu nu gargaara. Qulqulluun Phaawiloos warri seera barreeffamaa hin
laataminiif alagoonni akkamiin sammuu isaaniin qofa qalbeeffatanii ajaja seera
Muusee akka raawwatan, yoo ibsu, “seera
qabaachuu baatanillee, isaan ofii isaaniitii seera dha. Isaanis, sammuun
isaanii yoo ragaa ba’uuf, yaadni isaanis yoo wal himatu, ykn ammoo yoo walitti
qabatu seera sammuu isaanii keessatti barreeffame ni argu ;Waaqummaan isaa
uummama adduunyyaarraa jalqabee warra hojjatamaniif beekamee ifatti mul’ata
waan ta’eef”[Rom.1:19]. Bu’uuruuma kanaan yemmuu birraa kana, uummanni Oromoo malkaatti ba’ee yoo Waaqaaf
galata galchu, uummanni Itiyoophiyaa kakuu moofaarra eegalee ayyaana abaaboo
jedhee yoo kabaju[fulbaana 25][Bamasqaluu gannatin kaffata, Alamaayyahu Hayilee
Bagadaa sir’aat Yatulamaa Oromoo poolatikaa: 2000: 79 fi 80] abaaboo hongee
kana ilaalaniitu seera keessa isaaniitti barreeffame qalbeeffachuun uumamaan
uumaa raajeeffachuu isaaniiti.
Akka Kitaaba
Qulqulluuttis, Bara abbootii[Bara Addaamii eegalee hanga Muusee abbootii jiran]
abbootiin Waaqayyoon kan argachuu fi waaqeeffachuu danda’an seera
sammutiin.[Rom 1:20] Tokkumaa fi Sadummaa isaa sirnaan beekuu baatanis[Dn.
Birhaanuu Adimaas: 1996:67] warra isa barbaadaniif dhokataa kan hin taane
Waaqayyoon Ilma namaa tokkicha Addaamirraa uumee baraaf iddoo jireenyaatiin
addaan ba’anillee, hunda keenyafuu dhiyoo waan ta’eef, isa arganii jiru. [Uum.
5:22-24, Ib.11:5]. Abbootiidhaaf haalli itti mul’ate Kakuu Haaraa irratti
mul’ata raawwatee fi Muuseetti kan mul’ateen tokko ta’uu baatuullee, amantiin
isaanii garuu bara kamiyyuu abootii ka’anii gadii miti. [Dn. Birhaanuu Adimaas:
1996:68] Kuni qabatamaadhaan Waaqayyoon beekuudhaaf uumama qalbeeffachuudhaan uumaa beekuun akka
danda’aamu nuuf addeessa.
Eegaa ragaawwan kanneen
hunda dhiisnee, jiraachuu Waaqayyoo shakki keessa yoo galchine, nuti jiraachuu
isaa amanuu baannus, Innoo Ofii isaa waan hin ganneef,[2Xim.2:13] Ofii isaatiin
amanamaa ta’ee bara baraaf kan itti fufuudha, akkuma ergamaan Phaawiloos “warri
hin amnne yoo jiraatan, amanuu baachuun isaanii amanmuummaa Waaqayyoo ni
hambisaayii?” jedhe.[ Rom. 3:3]
Qabxii kana jecha
Qulqulluu Daaawiitiin haa goolabnu. Akkana jedha: “Dacheen cufti kan
Waaqayyooti, adddunyaanis isheerra kan jiraatan hundi isaanii, inni
garbootarratti hundeessee jira waan ta’eef, dhangala’aawwannirrattis cimsee
jira waan ta’eef akksumas Samiiwwan ogummaadhaan hojjatee jira...qofaa isaa
ifoota gurguuddaa kan hojjate. Aduuf guyyaa bitamsiisee jira, Ji’aa fi
urjiiwwaniifis halkan bitamsiisee jira”[Faar.23:1 fi 135:5-9]
Itti fufa..........
Galanni Waaqayyoof haa ta'u1
