Cuuphaa Gooftaa Keenya Iyyasuus Kiristoos

Maqaa Abbaa kan Ilmaa kan Afuura Qulqulluu Waaqa Tokkoon.Ameen!

                                                   Wiirtuu Naqamtee irraa

“Samiin banamee Afuurri Qulqulluun bifa guuggeetiin muldhatee irra bu’e,sagaleenis samii irraa akka dubbate,ati ilma koo isa jaalatamaa dha, gamachuun koos sitti ni raawwatama”  kan jedhu ni dhagahame(Luq 3:21).Gooftaan waggaa 30 tti(Luq 2:23)  cuuphame.(Mat 3:17)

Hiika Cuuphaa – cuuphaa jechuun cuuphamuu, bishaan keessa seenanii bahuu jechuudha. Cuuphaan icciitiiwwan Mana Amantaa Ortodooksii Tawaahidoo keessatti raawwataman keessaa isa tokkoo fi kan jalqabaa yommuu ta’u, amantoonni kan mana amantaatti ittiin galan, mucummaa fi kabaja Waaqayyorraa kan ittiin argatan dha. Icciitii wanti jedhameefiis mucummaa Sillaasee (Sadummaa) isa ijaan hin argamne kan ittin arganuu fi warreen hin amanneef icciitii jedhama.

Afaan yoonaaniin ‘Ephifaanii’ jedhama hiikni isaas mul’achuu tokkummaa fi sadummaa Waaqayyoo jechuu dha. Akkuma wangeela Maat.3:13 irratti Iyyasuus cuuphamee akkuma baheen bantiiwwan samii hundi ni banamani achumaanis Afuurri Waaqayyoo akka gugeetti(Afuura Qulqulluun) isarra bu’uusaa arge. kunoo sagaleen(Abbaan) ammoo inni kun Ilma koo isan jaaladhu ittis gammadudha jedhe icciitiin tokkummaa fi sadummaan Sillaasee kan Yoordaanositti mul’ate waan ta’eef. Sababni isaa Gooftaan Iyyasuus Ilma Waaqayyoo ,waaqa ta’uusaa warreen shakkaniif ibsuuf.

Gooftaa fi fayyisaan keenya Iyyasuus Kiristoos raajiiwwan himamaa turan raawwachuuf, nuuf fakkeenya ta’uuf, bishaan eebbisuuf akkasuma cuuphaaf humna ta’uuf  laga Yordaanositti cuuphame. Iyyasuus Kiristoos harka Yohaannisitti cuuphamuuf Galiilaadhaa gara Yoordaanositti dhufuu isaa agarsiisuuf guyyaa ayyaana cuuphaa kana taabotni teessoo isaanirraa ka’anii lafa bishaan jiru bulu (Mat3:13).

Ayyaannii cuuphaa kun guyyaa Roobii ykn guyyaa Jimaataa irra yoo oole hin soomamu. Kunis kabaja Gooftaa fi ayyanichi kabajni isaa hammam guddaa akka ta’e ibsuu fi.

   Gooftaan Iyyasuus Maaliif Laga Yoordaanositti Cuuphamee?

Gooftaan keenya Iyyasuus kan inni cuuphameef sababoota armaan gadiifi

1. Raajii abbaan keenya Daawit dubbate sana raawwachuuf. Faarsaa Daawit 113(114):3 irratti galaanni argee ni baqatee ,lagni Yoordaanoosiis gara boodatti ni deebite ati yaa yoordanoos maaliifi baqattee jedhee abbaan keenya Daawwit raajii dubbatee waan tureef, raga sana raawwachuuf Yordaanositti cuuhame.

2. Saboota adda adda turan tokko isaan taasisuuf  laggeewwan laman Yoor kan gandoota  ormootaa keessaa yaa’uufi Daanoos kan ganda Yihuudotaa keessaa yaa’anidha. Gooftaan bakka lageewwan lamaan kun walitti makamanitti cuuphamee. Inni Yihuudota qofaaf ykn ormoota qofaaf akka hin dhufnee fi dhala namaa maraaf akka dhufe kan agarsiisudha.

3. Seera cuuphaa nuuf  kaa’uuf(nu barsiisuuf).

4. Addaam dargaggeessa umuriin waggaa soddoomaan Waaqayyoon gaddisiisee Jaannata keessa bahee mucummaa Waaqayyoo isa dhabee deebisuuf dhufuusaa yommuu ibsuu Gooftaan keenya Iyyasuus Kiristoos umuriisaa waggaa soddomaatti harka Yohaannisitti cuuphame.

5. Xalayaa garbummaa Addaamii fi Heewaan yommuu gannata keessaa bahan seexanni dhagaa battee lama irratti “Addaam garbicha Daabiloos, Heewaan garbitti Daabiloos” jedhe mallattessisiisee tokko Sii’ool keessa tokko immoo galaana Yordaanoos keessa dhoksee ture. Gooftaaniis xalayaa gabrummaa sana sana balleessuuf galaana yoordaanositti cuuphame.

Gooftaan maaliif gara Yohaannis deemee cuuphamee?

·        Gadi of qaqqabummaa barsiisuuf

·      Seera nuuf tumuu isaati. Jechuun osoo Gooftaan Yohaannis bira deemee cuuphamuu baatee, mootoleen, abbootni qabeenya adda addaa manatti koottaa maatii keenyaa nuuf cuuphaa jedhani abboota luboota ni rakkisu turani. Kanaaf manni amantaa barumsa Gooftaa irraa argatte kanan ummata kamiyyuu osoo adda hin qoodiin mana amantatti ni cuuphti.

Manni amantaa Ortodooksii Tawaahidoos yeroo hunda amajjii 11 waggaa waggaan amajjii sirna ho’aa ta’een yaadannoof,eebbaaf akkasuma fayyina fooniif fi sugaaf ayyaana kana ni kabajji.

Eebbi Waaqayyoo, araarrii fi Kadhaan haadha keenyaa Dubroo Maariyaamii, Eegumsii Eramoota samii akkasumas Araarsummaan Qulqullootaa nuuf haa baay’atu. Ameen

                                  Ayyaana gaarii