Maqaa
Abbaa Kan Ilmaa Ilmaa Kan Afuura Qulqulluu Waaqa Tokkoon. Ameen!
Mootii
Beenyaatiin(Wiirtuu Adaamaa)
“Garaa koo keessa qortee
halkanis dhuftee yoo na ilaalte, keessa koos garagalchitee yoo fonqolchite,
hamaa yaaduu koo hin argitu; dubbii afaan kootii keessaas irra-daddarbaan hin
argamu."
Faarfannaa 16(17):3
Maatiiwwaan
Waaqayyo filatee Umrii gaabbii isiniif kennamee kan guyyaa har’aa geessan akkam
jirtu? Akka fedhaa fi jaalala Waaqayyotti sooma keenyaa torbaan jaha xumurree
isa torbaffaa qabachuuf jenna. Kanaaf faarfannaa Daawit Sanbata kana
faarfatamuun dursine. Waldaan keenyaa barnoota sooma guddicha kana ilaallatan
darsaa jira. Ammas kan torbaan kanas haala armaan gadiitti waliin ilaalla!
Akka
barsiisa mana kiristaanaa keenyaatti torbaanonni laguu (sooma) guddicha gooftaa
keenyaa Iyyasuus Kiristoos moggaaasa adda addaan yaadatama. Wangeelli guyyaa
kana lallabamaniis bu’uurri isaanii moggaasa sanbattan soomaa kana irratti hundaa’a.
kan torbee kana waliin ilaallummoo torban torbaffaa kan Niqoodimoos jedhu ta’a.
Qulqulluu Yaaredis
torbee kanaaf faarfannaa akkas jedhu qopheesseera
“Namni Niqoodimos
jedhamu gara gooftaa Iyyasuus ni adeeme, yaa barrsiisaa, barsiisuudhaaf Abbaa
kee bira akka dhufte sitti ni amanna jedhe, Ilmoo leencaa rafte, mugdes, yeroo
du’aa ka’uutti ana kaasi”
Namootni
lammii Isaraa’el Dhufaati gooftaa keenyaa kan fudhatan haala wal makan ture.
Keessi isaanii shakkii adda addaan guutamees ture. Rakkachaa waan turaniif, nama
isaaniif dhufee gidiraa warra Roomanotaa jalaa bilisa isaan baasu eegaa turan.
Isaan kan eega turan inni gooftaa abbaan waan hundaa, kabajaa fi iddoo
kabajaama fi filatamaa jedhaniti ture. Garuu inni Masara mootummaa dhiisee
jaalala namaaf dalla horii keessatti dha. Ol ol jedhee miti gad of qabeeti ka
namaaf fakkeenya ta’aa ture. Kanaaf warri kaan waaqummaa isaa shakkaa turan. Kan
amantiidhaanis isa fudhatanis turan. Niqoodimoos nama warra kanaa ture.
Niqoodimoos
kan torbaan Sooma guddichaa manni Kiristaana keenya moggasteef eenyu laata?
1. Niqoodimoos
lammii Faarisootaati (yoh 3:1)
2. Niqoodimoos
hayyuu duree warra Yihuudotaa kan ture dha (Yoh 3:1)
3. Niqoodimoos
barsiisa wangeela ture(Yoh 3:!1-10)
4. Niqoodimos
foon gooftaa keenyaa kan kafane keessa tokko dha.
Kanaaf
Niqoodimoos hayyuu amantiiti; nama
baay’ee barate baay’ee beekesidha. Kanarraa kan ka’es hayyuu, beekaa, dursaa
jedhamee waamameera. Namoota jabana sana turan keessaayiis nama beekkamtii fi
beekumsa olaanaa qabu ture. Halkan gara Gooftaa Iyyasuus Kiristoos dhufaa
barachaa ture-barataa halkanii ture jechuudha. Niqoodimoos guyyaa guyyaa
barsiisaa mukuraabii ta’ee namoota baay’ee barsiisaa waan ooluu fi warri
Yihuudotaa Niqoodimoos barsiisaa ture Gooftaa waan hin amaniniif (hin
fudhatiniif) guyyaa guyyaa barachuu hin dandeenye. Akka seera warra
Yihuudotaatti namni Gooftaa fudhatee (amanee) fi duuka bu’e mukuraaba isaanitii
waan ari’amuuf isaan mufachiisuu dhabuuf jecha halkan barachaa ture.
Mee barumsa guyyaa kanaaf sababa ta’eefi
gaaffii Niqoodimoosii fi deebii gooftaa keenyaa haa ilaallu.
Niqoodimoos,
dura waaqummaa gooftaa keenyaaf akkas jedhee ture kan dhugaa baheef, “yaa barsiisa hoo Waaqayyo yoo isa wajjin
ta’e malee mallattoolee ati raawwattu kana raawwachaa jirtu kana kan raawwatu
hin jiruuti Ati Waaqayyo biraa barsiisaa taate akka dhufte beekna” jedhe.
Warri Yihuudotaa isa shakkanis inni haala kanaan amanamuummaa isaa gooftaasaaf
dhugaa baheera.
Barumsi
gooftaa guyyaa sana keessa mee kitaaba qulqulluu sababa godhannee haa ilaallu.
Gooftaanis
“Dhugaa dhugaan siin jedha namani lammata
yoo dhalate malee mootummaa Waaqayyo arguun (dhaaluu) hin danda’u” jedheen.
Niqoodimoos immoo, “ Namni erga qancaree attamitti
dhalachuu danda’a? Gadameessa haadha isaatti lammaffaa gale dhalachuu danda’a
moo? jedhe gaafate. Gooftaanis, “dhuguma dhuguman sitti hima, eenyullee yoo
bishaaniif Afuura Qulqulluurraa dhalachuu baate mootummaa Waaqayyotti galuu hin
danda’u. Namni foon irraa dhalate foon, hafuuratti kan dhalate hafuura, olii
dhalachuun isiniif in ta’a siin jechuu kootiif hin dinqifatiin. Qilleensi gara
fedhetti qilleensa, qilleensa’uu isaa ni dhageessa, eessa akka dhufu, eessa
akka dhaqu garuu hin beektu; egaa hafuuratti kan dhalate hundinuus akkuma kana”
jedhee deebiseef.
Niqoodimoos
Deebisee, “kun attamitti ta’uu danda’a?
jedhee gaafate. Gooftaanis akkas jedhee deebiseef; “Ati barsiisa warra Israa’eelii taatee kana hin beektuu? Dhugaa dhugaan
siin jedha waan beeknu ni dubanna; kan argines raga ni baana; raga ba’iinsa
keenyas hin fudhattan. Waa’ee biyya lafaa yommuun sitti himu kan hin amanne
waa’ee isa samii dhaa yoon sitti hime akkamiin amantuu? Samiirraa kan bu’een
alatti gara samii ka bahe eenyumtiyyuu hin jiru; innis kan samiirraa kan bu’e
Ilma namaa qofa dha” jedheen.
Ega
icciiti guddaan asirraa barannu hangam qormaanni nu qunnamus ka deemu qabnu
gara Waaqayyo jirutti dha. Dukkana addunyaa kana baqannnee gara fayyinni jiru
deemunis nuuf ta’a. Baqannaan keenya gara mana Waaqayyoti malee gara warra
shakkanii ta’uun irra hin jiraatu.
Niqoodimoos
hammam beeka ta’us Waaqayyo biratti hir’inni isa mudateera. Namni akkasuma waan
hundaa guutuu miti, hri’ina keenya guutuufis Waaqayyo akka nu barbaachisu
Niqoodimoos irraa ni hubanna. Karaa biraan barbaachisummaan cuuphaa ifa bahuu
isaaf kan sababa hir’ina isaati. Kan shakkitoonni ganamaaf galgala cuuphaa
morman hammam gatiin isaa akka guddaa ta’e as irra hubanna. Karaa biraan ammo
kan ta’uuf qabnu Waaqayyof malee Addunyaa kanaaf mit. Kan caalchifannuu
mootummaa Waaqayyoti malee waan foon keenyaaf miti.
Walumaa
galatti torbaan kana kana hubaachaa laguu keenya itti fufna, wanti beeku qabnu;
·
Hir’ina keenya beeku dha, kana
guuttachuuf Waaqayyotti baqachuu qabna,
·
Amantiin deemu qabna. Shakkiin amantii
keessatti barbaachisaa miti. Waaqayyo qabannaan hunduu karaa dha.
·
Dhugaa beeknuuf dhugaa bahuun amala
kiristaanaati. Waaqaa fi amantii keenyatti leeyya’uu hin qabnu.
·
Hanga dhumaatti abdii qabachuu nu
barbaachisa.
Waaqayyo
akkuma torbii (subaa’ee) laguu kanaa jalqabsiise ifa du’aa ka’uu isaaf nu ha
ga’u. ogummaa fi beekumsa isaan nu haa yaadatu. Hir’uu keenya iini beekati nuuf
haa guutuu
Galatni
Waaqayyof haa ta’u.
No comments:
Post a Comment
Note: Only a member of this blog may post a comment.